Հայ Առաքելական եկեղեցու Երուսաղեմի պատրիարքարանը քննադատել է Վատիկանին
Հայ Առաքելական եկեղեցու Երուսաղեմի պատրիարքարանը խստորեն դատապարտել է Վատիկանին վերջերս «Քրիստոնեությունն Ադրբեջանում. պատմություն և արդիականություն» միջազգային համաժողովի համար, որն անցկացվել է Հռոմում Ադրբեջանի կառավարության և վարչակարգի ակադեմիական քարոզչական ճակատի հովանու ներքո։
«Մենք պնդում ենք, որ Վատիկանը գործել է անպատասխանատու՝ թույլ տալով, որ իր ակադեմիական հարթակը հմտորեն օգտագործվի հանրահայտ և հորինված պատումի առաջմղման համար, որը ձգտում է ջնջել համաշխարհային ակադեմիական հիշողությունից Հայ Առաքելական եկեղեցու պատմական ներկայությունը Հարավային Կովկասում։ Առանց հայ գիտնականների մասնակցության նման միջոցառում կազմակերպելով՝ Վատիկանը իրեն թույլ է տվել մեղսակից դառնալ բնիկ քրիստոնյաների պատմության խեղաթյուրմանը, որոնց ներդրումը համաշխարհային քրիստոնեության մեջ, իրենց իսկ գիտական խոստովանությամբ, անհերքելի է։
Մենք պնդում ենք, որ Վատիկանը ականատես է եղել ռազմավարության, որը կոչված է ոչ միայն օրինականացնելու ներկայիս տարածքային պահանջները Հայաստանի նկատմամբ, այլև վերաշարադրելու հին քաղաքակրթությունների առկայությունը, որոնց արմատները խորն են և որոնց պատմությունը հնարավոր չէ ջնջել:
Ադրբեջանի այդ քարոզչական ճակատը ձգտում է կառուցել հետադիմական պատմություն, որն անարժան խորություն է հաղորդում իրենց երիտասարդ պետությանը հանձին Ադրբեջանի:
Մենք հաստատում ենք, որ իսկական ժառանգության փոխարեն այդ վարչակարգի ակադեմիական ճակատը Վատիկանին առաջարկել է ներկայացում։
Նման կոնֆերանսներում արտահայտված հիմնական թեզը, թե Արցախի (Լեռնային Ղարաբաղի) հայկական քրիստոնեական հուշարձաններն այսպես կոչված «կովկասյան աղվանական» քաղաքակրթության ժառանգությունն են, պատմական ժխտման չարաբաստիկ գործողություն է։ Սա ուղղակի հարձակում է բնիկ ժողովուրդների ժառանգության վրա, որոնց սուրբ ավանդույթները պահպանվել են այս հողի վրա հազարամյակներ:
Մենք կոչ ենք անում Վատիկանին պաշտպանել պատմական ճշմարտությունը և մերժել այն ամենը, ինչը ձգտում է ջնջել բնիկ քրիստոնյա համայնքների ժառանգությունը:
Կոչ ենք անում Վատիկանին հեռու մնալ դրանից և հաստատել իր հանձնառությունը Սուրբ և Առաքելական Հայ Ուղղափառ եկեղեցու քրիստոնեական ավանդույթի իսկությունը պահպանելու հարցում։
Հայկական անցյալի ճշմարտությունը չի կարող թաղվել լոբբիստական և ֆինանսավորվող ռևիզիոնիստական ստի տակ: «Մեր եկեղեցիները, մեր վանքերը, մեր ճարտարապետությունը, մեր այբուբենը, մեր սրբերն ու նահատակները, մեր հին գերեզմանոցները, մեր սուրբ մասունքները, մեր աստվածաբանական դպրոցները և մեր ժողովուրդը հայ առաքելական ավանդության կենդանի վկայությունն են»,- նշել է Երուսաղեմի պատրիարքարանը։
