Հարավային Կարոլինայում դպրոցական ավտոբուս է շրջվել. կա 1 զոհ և 18 վիրավոր

ԱՄՆ Հարավային Կարոլինա նահանգում ավտոբուս է շրջվել, ինչի հետևանքով մեկ մարդ զոհվել է, 18-ը՝ վիրավորվել։

Այս մասին հայտնում է Fox News հեռուստաալիքը՝ վկայակոչելով տեղի ճանապարհային պարեկային ծառայությանը։

Հեռուստաալիքի տվյալներով՝ միջադեպը տեղի է ունեցել Հարավային Կարոլինայի Չեսթեր շրջանի Ռիչբուրգ քաղաքի մոտակայքում։ Փայն Ռիջ ավագ դպրոցի մի խումբ աշակերտներ երեք ավտոբուսներով վերադառնում էին էքսկուրսիայից: Մեքենաներից մեկի անվադողը ծակվել է, ինչի հետևանքով այն շրջվել է: Fox News-ը նշում է, որ ավտոբուսում եղել է 35 դպրոցի աշակերտ և երեք մեծահասակ։

«Տասնութ մարդ վիրավորվել է, որոնցից մի քանիսը հոսպիտալացվել են, մեկ մարդ մահացել է»,- հաղորդում է հեռուստաալիքը՝ վկայակոչելով Հարավային Կարոլինայի պարեկային ծառայությանը։

Ինչպես հայտնում է Fox News-ը, մյուս երկու դպրոցական ավտոբուսները վթարի մասնակից չեն եղել։ Իշխանությունները շարունակում են միջադեպի հետաքննությունը։