Զոհեր հաշվող պարոն, լա՞վ եք կարդում այս թվերը, և՞... շա՞տ զարմացաք

Սուքիասյան Խաչատուրը հոգեվարքի մեջ է. միտումնավոր կերպով սադրում է արցախցիներին, որքան էլ ներողություն խնդրի: Պնդում ենք` սադրում է, միտումնավոր ատելություն է տարածում արցախցիների նկատմամբ: Ինչո՞ւ: Պատասխանը հենց ինքն է տվել իր` նախկինում արված հայտարարություններով: 

 «Դուք ուսումնասիրեք, թե 2020 թվականի զոհերից ինչքանն է Հայաստանի Հանրապետության տարածքից եղել, ինչքան են ՀՀ-ից գնացել էնտեղ գրանցված եղել և ինչքանն են Արցախից եղել․․․Շատ կզարմանաք, թե 2020 թվականի պատերազմին ինչքանն են Հայաստանի Հանրապետությունից մեր եղբայրները զոհվել, մեր երեխաները զոհվել, ինչքան են Ղարաբաղում գրանցվածները զոհվել, և ինչքան են Ղարաբաղի գրանցում ունեցողները զոհվել»։

Սա հատված է Factor.am-ին նախկինում նրա տված մի հարցազրույցից: Ֆիքսեք` ՀՀ-ից զոհվածները «մեր եղբայրներն» ու «մեր երեխաներն» են, Արցախից զոհվածները` «Ղարաբաղում գրանցվածները» ու «Ղարաբաղի գրանցում ունեցողները»: Ի՞նչ է սա` եթե ոչ պառակտում հայ ազգի երկու մասերի միջև: 

Տնտեսագիտությունն ու թվերն առհասարակ լավ յուրացրած պատգամավորին նախ հիշեցնենք, որ հայկական հազարամյա հայրենիքի համար նահատակվածները զուտ իր մասնագիտությունն ու թվերը չեն: Դրանք ընտանիքներ են, մայրեր, հայրեր, քույրեր, իրենց սիրած տղաներին կորցրած աղջիկներ ու դուստրեր: 

«Շատ կզարմանաք»,- ասել էր Սուքիասյանը: 

Այսպիսով` շատ զարմացնենք սույն պարոնին: 

«Արցախցիները կռվե՞լ են»,- հարցնում է իբրև թե ներողություն խնդրած անձը: Ո՞ւմ է հարցնում` տիկին Ալլա Ստեփանյանին, որ երկու որդուն մեկ պատերազմի ընթացքում է կորցրել: Գիտե՞ք` ինչ է ասել նրա որդի Արսենը մարտական ընկերներին պատերազմը սկսելուց քիչ առաջ: Կատակել է` ես չեմ մեռնելու: Գնացե'ք, պարոն Սուքիասյան, ու ապրեք այդ մտքի հետ: 

2023-ի պատերազմում զոհված Մուսայելյան Խոսրովի կնո՞ջն եք հարցնում, ում ամուսինը պատերազմ գնալուց ասել է` ես գնում եմ իմ որդու մոտ: Իսկ գիտե՞ք, թե որտեղ էր նրա որդին. զոհվել էր 44-օրյա պատերազմում: Գնացեք, պարոն Սուքիասյան, ու ապրեք այս մտքի հետ:

Տիկին Մարինեի՞ն, ում ամուսինը սպանվել էր Արցախի ոստիկանությունում ծառայելիս, իսկ ոստիկան որդին պատերազմո՞ւմ զոհվեց:

Շա՞տ զարմացաք:

Քանի՞ օրինակ բերենք, պարոն Սուքիասյան, որ Արցախում զոհվածների մասին իմանաք: Իմանա'ք, որ մեկ տան մեջ մեկից ավելի զոհեր են եղել, ու գուցե սիրտներդ հովանա: Մաքրվեք թույնից: 

2021 թվականին Արցախի մի գյուղում զորակոչի ենթակա էր 4 տղա: Գիտե՞ք, որքան զոհ էր տվել այդ գյուղը 2020 թվականին: 4 զոհ: Դուք թվեր եք սիրում, պարո'ն Սուքիասյան, դա հասկացա՞ք, թե ինչ թիվ է: Դա ամբողջ զորակոչն է, պարոն Սուքիասյան: Հանգստացա՞ք:

Հայաստանի ու Արցախի զոհերին, կռված, ընկած տղերքին թվերով հաշվող Սուքիասյա'ն, դուք հաստատ բոլորիցս լավ գիտեք, թե ինչպես հաշվել բնակչություն-զոհեր հարաբերակցությունը: Դուք չե՞ք կարդացել «Փաստերի ստուգման հարթակի» հրապարակումը Ձեր մասին, որ Դուք մանիպուլացնում եք արցախցի զոհերի վերաբերյալ տվյալները: 

Ասում եք` «3000-ից ավել» զոհ են տվել Հայաստանն ու Արցախը: Ձեր շեֆի խոսույթի` +/-50 զոհի ավելի վատ տարբերակն է: Ձեր իշխանությանը, ձեզ ենթարկվող ՊՆ-ին ու ՊԲ-ին հստակ անուն-ազգանունով, առողջ երիտասարդներ են տվել մայրերը: Չե՞ք կարողանում կոնկրետանալ, պատգամավոր եք, հստակ թվեր ուզել ՊՆ-ից, Քննչականից: Ձեր բիզնեսներին, ձեր այնքան սիրելի փողերին տվյալներ, որ պետք լինեին, մեկին մեկ կիմանայիք, կպարզեիք, այնպես չէ՞: Իսկ զոհե՞րը: Դրանք Ձերը չեն, բայց, տխրեցնենք Ձեզ, Ձեր խղճին են, Ձեր ներկայացրած քաղաքական ուժի դավադիր կամ հիմար մտքերի հետևանքն են այդ կործանված ճակատագրերը: 

3749: Սա Քննչակական կոմիտեի ներկայացրած թիվն է ընդհանուր զոհերի: 835: Սա զոհված արցախցիների թիվն է: Ձեր սիրտը հաշվա՞րկ է ուզում: Ներկայացնենք, Ձեր սրտին դարման լինի: Գուցե հանդարտվեք, դադարեք թույն թափել: Ձեր ապագա գործընկեր թուրքերի սիրտը շահելու այլ հնարներ գտնեք: Եթե ընդունենք, որ 150 հազար մարդ էր ապրում Արցախում 44-օրյա պատերազմի մեկնարկին, ապա զոհվել է Արցախի բնակչության 0,55 տոկոսից ավելին: Եթե ընդունենք, որ 3749-ից 835-ն արցախցիներ էին, ապա ստացվում է, որ Հայաստանից զոհվել է 2914 մարդ: Դա Հայաստանի բնակչության 0,09 տոկոսն է: Եթե Աստված մի' արասցե Հայաստանից զոհվեր այնքան մարդ, ինչքան Արցախում է զոհվել, ապա կստացվեր, որ Հայաստանում զոհերի թիվը կլիներ, ուշադրություն, 15.000: Լա՞վ եք կարդում այս թվերը, պարոն Սուքիասյան: 

Շա՞տ զարմացաք, պարոն Սուքիասյան: 

Եվ հետո, պարոն Սուքիասյան, պատերազմին մասնակցելը միայն զոհվելը չէ: Պարզ է, չէ՞, որ արցախցիներն ավելի լավ իմանալով իրենց բնակության վայրերի տեղանքը, ավելի հեշտությամբ են փրկվել, ի դժբախտություն Ձեզ, պարոն Սուքիասյան, մանևրել են ու փրկվել, քան Հայաստանից մեկնածներից շատերը, որ, ցավոք, դժվարություններ են ունեցել տեղանքի չիմացության պատճառով: 

Հա, մեկ էլ, եթե միտում չունեիք պատերազմը լղոզելու, զոհերի արածը նվաստացնելու, որ այդ ֆոնին Ձեր արած ճղճիմ գործը` փող աշխատելն արդարացվի, մեկ անգամ հետաքրքրվեիք, թե ՊԲ կայքն ու ֆեյսբուքյան էջը, որտեղ այդ զոհերի անուն ազգանուններն էին հրապարակված, ինչու են փակվել: Կամ ինչո՞ւ է ՔԿ կայքից հեռացված 2022 թ. հունվարի 19-ին-ի զոհերի մասին հրապարակումը:

...Հավերժ փառք մեր մեկ հայրենիքի` երկու հայկական պետությունների պաշտպանության ժամանակ ընկած և պատերազմին մասնակցած, թշնամու առաջ մեր հայրենիքի դռները չբացած հայորդիներին ու հավերժ ամոթ` նրանց գործն ուրացողներին: