ՍԴ-ի կայացրած որոշումը ծաղր է իրավաբանության նկատմամբ. փաստաբան
Սահմանադրական դատարանի կողմից «Ապօրինի ծագում ունեցող գույքի բռնագանձման մասին» օրենքի սահմանադրականության վերաբերյալ կայացված որոշումը, իմ խորին համոզմամբ, պարզապես ծաղր է իրավաբանության նկատմամբ: Այս մասին ֆեյսբուքյան իր էջում գրել է փաստաբան Տիգրան Աթանեսյանը:
«Չէր կարելի ավելին սպասել մի հիմնարկից, որը ձևավորվել է ադրբեջանաթուրքական իշխանության կողմից՝ 2020 թվականի սահմանադրական հեղաշրջման արդյունքում: Որոշման տեքստը կարդալիս պարզ են դառնում Դիմող կողմի հիմնավորված և տրամաբանված փաստարկները մի կողմից, և սահմանադրական դատարանի բառիս բուն իմաստով խղճուկ աճպարարությունները մյուս կողմից: Ինչ վերաբերում է իմ որոշ կոլեգաների արտահայտած զգուշավոր դրական կարծիքներին, ապա պետք է ասել, որ սահմանադրական դատարանի այն իբր թե նորմալ մեկնաբանությունը, որ բռնագանձման առարկա կարող են լինել կամ հանցանքի հետ կապ ունեցող գույքերը կամ էլ միայն անձի պաշտոնը ստանձնելուց հետո ձեռքբերված գույքերը, ապա դրանք որևէ էական և լուրջ ազդեցոթյուն գործընթացների վրա չեն ունենալու: Իրականում այդ օրենքը և դրա կիրառմամբ զբաղվող անձինք որևէ աղերս չունեն թե կոռուպցիայի դեմ պայքարի հետ, թե որևէ այլ, արդարացի նպատակի հետ: Թե օրենքը, թե դրա կիրառողները ընդամենը կապիտուլյանտի ձեռքում քաղաքական գործիքներ են՝ պոպուլիզմով զբաղվելու համար, կամ, ինչը շատ ավելի կարևոր է, քաղաքական որոշ օպոնոնետներին ճնշելու և/կամ սեփականությունը վերաբաշխելու համար:
Հ.Գ. Որպեսզի տպավորություն չստեղծվի, թե իբր ես պաշտպանում եմ կոռուպցիոներների գույքը, պետք է նշեմ, որ ես ավելի ռացիոնալ մեթոդների կողմնակից եմ, որոնք պետք է իրականացվեն ազգային կողմնորոշում ունեցող իշխանությունների կողմից՝ կոռուպցիոներների գույքը պետք է պարզապես ազգայնացվի, այն էլ՝ ոչ դատական կարգով»:
