Թշնшմու ոճրագործ ձեռագիրը, հայատյաց քաղաքականությունը նույնն է նաև այսօր. քաղաքակիրթ աշխարհի աչքի առաջ բռնազավթվեց Արցախը, բռնի տեղահանվեցին շուրջ 120 000 հայեր. Էդուարդ Բաբայան

20-րդ դարասկիզբը հայ ժողովրդի պատմության ողբերգական էջերից է, երբ սկիզբ դրվեց հայության զանգվածային տեղահանությունների, կոտորածների, հայկական պատմամշակութային ժառանգության ոչնչացման երիտթուրքական ծրագրին: Այս մասին ֆեյսբուքյան իր էջում գրել է Աբովյանի համայնքապետ Էդուարդ Բաբայանը:
 
«Այսօր լրանում է հայության դեմ իրագործված մեծագույն ոճրագործության` Հայոց ցեղասպանության 110-րդ տարելիցը և մենք բոլորս, ցեղասպանությունը վերապրած հայերի սերունդները հայրենիքում և սփյուռքում շարունակում ենք ամենամյա տարաբնույթ միջոցառումներով, քայլերթերով, հարգանքի տուրքով ու բողոքի ակցիաներով բարձրաձայնել պատմական անարդարության և հայկական պահանջատիրության մասին:
  
Մեր օրերի իրողությունները համադրելով իրավացիորեն պիտի փաստենք, որ թշնամու ոճրագործ ձեռագիրը, հայատյաց քաղաքականությունը նույնն է նաև այսօր. քաղաքակիրթ աշխարհի աչքի առաջ բռնազավթվեց Արցախը, բռնի տեղահանվեցին շուրջ 120 000 հայեր։
 
Սիրելի՛ հայրենակիցներ. 
Մեծ Եղեռնի տարելիցը, մեզ համար հիշատակի և խոնարհումի օր է, այսօր մենք ոգեկոչում ենք Հայոց ցեղասպանության 1,5 մլն անմեղ զոհերի հիշատակը, որոնց բազմաթիվ սերունդներ շարունակում են խնամքով պահպանել ու փոխանցել իրենց ծագմանն ու բնօրրանին առնչվող հուշեր և փաստեր:
  
Ապրիլի 24-ը առավել քան երբևէ մեզ համար պիտի լինի նաև համազգային պայքարի օր՝ հանուն Մեծ Եղեռնի ընդունման, ճանաչման և արդարության վերականգնման: Առաջնորդվելով պատմական հիշողությամբ՝ պիտի ապրենք արժանավայել ներկա և կառուցենք լուսավոր ու խոստումնալից ապագա»: