«Բարի եկաք․ մեր աղոթքն է՝ խաղաղության և հարևանների հետ հաշտության ձեր ծրագրերը լինի հաջողությամբ»․ Վազգեն արքեպիսկոպոսը՝ Փաշինյանին (տեսանյութ)

«Մեր աղոթքն է, որ ձեր այն ծրագրերը, որոնք ունեք խաղաղության և մեր Հայաստանի հարևանների հետ հաշտության, լինի հաջողությամբ»,- պաշտոնական այցով Տալլինում գտնվող Նիկոլ Փաշինյանին է ասել Բալթյան երկրների Հայոց թեմի առաջնորդ Գերաշնորհ Տ. Վազգեն արքեպիսկոպոս Միրզախանյանը: Նշենք, որ Փաշինյանն այցելել է Սուրբ Գրիգոր Լուսավորիչ եկեղեցի։ Տ. Վազգեն արքեպիսկոպոս Միրզախանյանը նաև ասել է. «Մեր աղոթքն է, որ որպես եվրոպական երկրների հավատացյալներ, քաղաքացիներ և առաջնորդ, մեր երկիրը դեպի Եվրամիության իր քայլերն անի, որովհետև մեր քրիստոնեությունը եկել է իրականության մեջ արևմուտքից։

Համոզված եմ, որ այն քաղաքակրթությունը, որ տեսնում ենք այստեղ մեր երկրի ապագան այս քրիստոնեական գեղեցիկ միջավայրում է: Մեր աղոթքն է, որ այդ հաջողությունները լինեն, որ Հայաստանը նույնպես մերձբալթյան երկրների պես, դիցուք Էստոնիայի, կարողանա խաղաղ համագործակցությամբ մեր ժողովրդին լավ, գեղեցիկ ապագա ապահովել:

Թող Տերն օրհնի Հայաստանը, ձեզ և բոլոր բարի առաքելությունները: Բարի եկաք»: