ՀՀ-ում աշխատավորի օրն ամենակեղծ օրերից է, աշխատավորների շահերի պաշտպանությունը գրեթե զրոյական է. Բադալյան
Քաղաքական վերլուծաբան Հակոբ Բադալյանը գրում է. «Հայաստանում աշխատավորի օրն ամենակեղծ օրերից մեկն է, որովհետեւ Հայաստանում աշխատավորների շահերի պաշտպանությունը գրեթե զրոյական մակարդակի վրա է:
Ընդ որում, գործնականում ոչ մի էական ռեֆորմ չի իրականացվել ու իրականացվում այդ հարցում շոշափելի փոփոխության հասնելու համար:
Հայաստանում օրակարգի կարեւորագույն հարցերից մեկը պետք է լիներ արհմիությունների համակարգի ձեւավորումը, որը թույլ կտար լուծել երկու կարեւոր խնդիր՝ մի կողմից ապահովել աշխատողների իրավունքների պաշտպանություն, մյուս կողմից՝ այդ խնդիրը լուծել գործատուների հետ հրաբերության քաղաքակիրթ մեխանիզմով, որը կարեւոր հանգամանք է հանրային համերաշխության խնդրի տեսանկյունից:
Հայաստանում կապիտալի նախնական կուտակման գործընթացը բերել է հանրային տրամադրությունների մի լրջագույն արատի՝ հասարակության, այսպես ասած, աղքատ կամ համեստ կարողությունների տեր մարդկանց որոշակի բաց կամ լատենտ ատելությունը՝ հարուստների նկատմամբ:
Այս երեւույթը մշապես ենթարկվել է քաղաքական շահարկումների ու խաղարկումների ու այդպես է առ այսօր:
Արհմիությունների կենսունակ համակարգի ձեւավորումը կարեւոր քայլ կամ բաղադրիչ կլինի այդ խնդիրը հաղթահարելու ուղղությամբ: Իսկ դրա հաղթահարումը կարեւոր է, որովհետեւ «դասակարգային ատելությամբ» երկիրը երբեք չի կարող արդիականանալ եւ այդ երկիրը երբեք չի կարող լինել ինքնիշխան, որքան էլ բարձր լինեն ինքնիշխանության մասին դեկլարացիաներն ու բաժակաճառերը:
Նաեւ հենց այդ նկատի ունեմ, երբ պարբերաբար նշում եմ, որ ինքնիշխանությունը սեփական երկրում ներքին կյանքը եւ հասարակական հարաբերությունները կառուցելու կարողությունն է, այլ ոչ թե տարատեսակ արտաքին թեմաներով մանիպուլյացիաները»:
