69 մլն դրամ` «Երևանի քաղաքապետի գավաթ 2025»-ի համար. թվեր. «Ժողովուրդ»
«Ժողովուրդ» օրաթերթը գրում է.
«Մայիսի 1-4-ը մայրաքաղաքում կանցկացվի «Երևանի քաղաքապետի գավաթ 2025» գեղասահքի միջազգային բաց մրցաշարը: Սպորտային միջոցառումների կազմակերպման ծառայություններ և «Երևանի քաղաքապետի գավաթ 2025»-ի համար հատկացվել է 69 մլն 578 հազար դրամ (մոտ 176 հազար ԱՄՆ դոլար) գումար քաղաքային բյուջեից։
Ըստ փաստաթղթերի՝ «Երևանի քաղաքապետի գավաթ» մրցաշարն անհրաժեշտ է անցկացնել 4 մարզաձևերից՝ բռնցքամարտ, ձյուդո, վոլեյբոլ և բասկետբոլ:
Պայմանագրի համաձայն՝ բռնցքամարտիկներին անհրաժեշտ է ապահովել՝ մրցավարների և սպասարկող անձնակազմի օրապահիկների բաշխում և դրամական պարգևատրում՝ օրական 20.000-ական դրամ։
Հաղթողներին և մրցանակակիրներին անհրաժեշտ է ապահովել դրամական պարգևատրումով 13 քաշային կարգերում՝ 1-ին տեղ 500.000 ՀՀ դրամ, 2-րդ տեղ 300.000 ՀՀ դրամ, 3-րդ տեղ 200.000 ՀՀ դրամ․ հարկերը ներառված չեն։
Պայմանագրի համաձայն՝ ձյուդո մարզաձևում մրցավարներին և սպասարկող անձնակազմին անհրաժեշտ է ապահովել օրապահիկների կանխիկ գումարների բաշխումով։ Այն կազմում է դրամական պարգևատրում՝ օրական 15.000-ական դրամ, առնվազն 30 անձի համար։
Անհրաժեշտ է հաղթողներին և մրցանակակիրներին ապահովել դրամական պարգևատրումով՝ 1-ին տեղ 150.000 ՀՀ դրամ, 2-րդ տեղ 100.000 ՀՀ դրամ, 3-րդ տեղ 80.000 ՀՀ դրամ, ինչպես նաև հաղթողների մարզիչներին՝ 75.000-ական ՀՀ դրամ․ հարկերը ներառված չեն։
Պայմանագրի համաձայն՝ անհրաժեշտ է ապահովել վոլեյբոլի մրցավարներին և սպասարկող անձնակազմին օրապահիկների կանխիկ գումարների բաշխում և դրամական պարգևատրում օրական 10.000-ական դրամ (առնվազն 30 մրցավար)։ Անհրաժեշտ է ապահովել նաև հաղթող և մրցանակակիր թիմերին դրամական պարգևատրում՝ 1-ին տեղ 3.000.000 ՀՀ դրամ, 2-րդ տեղ 2.000.000 ՀՀ դրամ, 3-րդ տեղ 1.000.000 ՀՀ դրամ․ հարկերը ներառված չեն։
Անհրաժեշտ է ապահովել բասկետբոլի մրցավարների և սպասարկող անձնակազմի օրապահիկների բաշխում և դրամական պարգևատրում՝ օրական 10.000-ական դրամ։
Հաղթողներին և մրցանակակիրներին անհրաժեշտ է ապահովել դրամական պարգևատրում՝ 1-ին տեղ 3.000.000 ՀՀ դրամ, 2-րդ տեղ 2.000.000 ՀՀ դրամ, 3-րդ տեղ
1.000.000 ՀՀ դրամ․ հարկերը ներառված չեն։
Թվում է, թե ամեն բան կարգին է, սակայն այս միջոցառումը կազմակերպող անհատ ձեռներեց «Արմիկ Սարուխանյան Սամվելի» Ա/Ձ-ն հիմնվել է մարտի 14-ին, իսկ պայմանագիրը կնքվել է մեկ ամիս անց՝ ապրիլի 25-ին։ Հարկ է նշել, որ անգամ ամենափորձառու ընկերություններին 178 հազար ԱՄՆ դոլար արժողությամբ պայմանագիր կնքելը դժվար է տրվում։
Այս անփորձ ընկերությունը նույն օրը կնքել է Երևանի քաղաքապետարանի հետ 2-րդ պայմանագիրը, որն արժեցել է 3 մլն 900 հազար դրամ։
Երկրորդ պայմանագրով «Արմիկ Սարուխանյան Սամվելի» Ա/Ձ-ն պարտավորվում է կազմակերպել «Վերջին զանգ-2025 թվական» միջոցառումը։ «ԹՈՒՄՈ»-ի այգում կազմակերպվելու է Վերջին զանգի օրվան նվիրված տոնական միջոցառում-համերգ բարձրակարգ, ճանաչված, էստրադային երգիչ/երգչուհիների (2հոգի), հայտնի նվագախումբ/բենդի և DJ-ի (էլեկտրոնային երաժշտություն) մասնակցությամբ:
Միջոցառման ընթացքում անհրաժեշտ է ապահովել ընդհանուր թվով 100 սպիտակ (հելիում գազով) փուչիկներ՝ 90 հատը սովորական, 10 հատը աղավնու տեսքով։
Նշված անհատ ձեռներեցը կարծես միջոցառումների կազմակերպման հարցում շատ լուրջ է տրամադրված և գնառաջարկ է ներկայացրել ԵՊՀ շրջանավարտների ֆորում միջոցառման կազմակերպական ծառայությունների մատուցման համար, որը կազմել է 14 մլն դրամ»։
Մանրամասները՝ «Ժողովուրդ» օրաթերթի այսօրվա համարում:
