Պետական պարտքը 5 տրիլիոն 318 մլրդ դրամ է, ավելացել է 4.4 տոկոսով. Նախարար

Պետական պարտքը մարտի 31-ի դրությամբ կազմում է 5 տրիլիոն 318 մլրդ դրամ, ինչը նախորդ տարվա դեկտեմբերի 31-ի դրությամբ ավելացել է 4.4 տոկոսով, դոլարով արտահայտած՝ աճել է 5,8 տոկոսով. ասուլիսին հայտարարեց ՀՀ ֆինանսների նախարար Վահե Հովհաննիսյանը։

 «2024թ.-ի արդյունքներով՝ պետական պարտք –ՀՆԱ հարաբերակցությունը նվազել է 0,1 տոկոսային կետով, դոլարով պարտքը կազմում է 13 մլրդ 581 մլն դրամ»,-ասաց նախարարը՝ պնդելով, որ ամբողջ պարտքի ներգրավումը և ծավալները պլանավորված են ՀՀ բյուջեով և միջնաժամկետ պարտքի ռազմավարությամբ։

Նախարար Հովհաննիսյանը նշեց, որ ներքին պարտքի մասնաբաժինն ընդհանուրի մեջ աճել է․

«Մենք հասել ենք 50 տոկոս մակարդակին, ինչը բավականին դրական ցուցանիշ է։ Մեզ նման երկրներում, ներքին պարտքը կազմում է 20-30 տոկոս։ Մեզ մոտ էլ էր այդ ծավալին, կարողացանք մեծացնել, որը որոշակիորեն մեղմացնում է արտարժութային ռիսկերը»,-ասաց նա։