Զեկույց՝ ՀՀ ՆԳՆ-ին հեռավար կենսաչափական վերահսկողության լիազորություն տվող օրենքի վերաբերյալ

Քաղաքական իրավունքների հայկական կենտրոնը հրապարակել է զեկույց՝ ՀՀ ՆԳՆ-ին հեռավար կենսաչափական վերահսկողության լիազորություն տվող օրենքի վերաբերյալ (օրենքի համարը՝ ՀՕ-65-Ն): Բուն օրենքը ոստիկանությանը բոլոր տեսակի իրավախախտումների պարագայում տեսահսկման համակարգերի միջոցով անձանց նույնականացում իրականացնելու լայն լիազորություններ է վերապահելու: Ելնելով օրենքի համահեղինակի ելույթից՝ արհեստական բանականության և դեմքի ճանաչման համակարգերի միջոցով ոստիկանությունը հնարավորություն է ունենալու նույնականացնել անգամ «փողոցում աղբ թափող» մարդկանց և վարչական պատասխանատվության ենթարկել նրանց։

Հաշվի առնելով մարդու իրավունքների միջազգային չափանիշները, ներառյալ՝ ՄԱԿ մարդու իրավունքների բարձր հանձնակատարի և Մարդու իրավունքների եվրոպական դատարանի մոտեցումները դեմքի ճանաչման համակարգերի կիրառման վերաբերյալ, օրենքի կիրառությունը անխուսափելիորեն հանգեցնելու է մի շարք, ներառյալ՝ անձնական կյանքը հարգելու, խաղաղ հավաքների ազատության իրավունքների խախտումների։

Օրենքը չի անցել մարդու իրավունքների տեսակետից ռիսկայինության գնահատում, ինչպես նաև չի ներկայացվել ԵԽ Վենետիկի հանձնաժողովին և ԵԱՀԿ/ԺՀՄԻԳ-ին՝ փորձագիտական կարծիք ստանալու նպատակով։ Այն ուժի մեջ է մտնելու սույն թվականի օգոստոսի 9-ին։ Համապատասխանաբար, ՔԻՀԿ-ը առաջարկում է․ 1. Չեղյալ ճանաչել 2025 թ․ մարտի 5-ին ընդունված «Ոստիկանության մասին» փոփոխություններ և լրացումներ կատարելու մասին թիվ ՀՕ-65-Ն օրենքը, կամ 2. Հետաձգել նշված օրենքի ուժի մեջ մտնելը և առկա խմբագրությամբ այն ներկայացնել ԵԱՀԿ/ԺՀՄԻԳ-ին և Վենետիկի հանձնաժողովին՝ կարծիք ստանալու նպատակով։