Ես չեմ հայհոյել. հիմա ասեք՝ իմ կողմից սադրանքն ինչո՞ւմն է կայանում, որ այս իշխանության թալանն ու կոռուպցիա՞ն ենք բացահայտում. Արթուր Չախոյան
Իմ նկատմամբ բռնությունից հետո փորձ է արվում իրականությունը մանիպուլացնել. լրագրողների հետ հանդիպմանը հայտարարեց ակտիվիստ Արթուր Չախոյանը՝ շնորհակալություն հայտնելով վերջիններիս՝ Նոր նորքի թաղապետարանի հետ տեղի ունեցած միջադեպին անդրադառնալու և անաչառ ներկայացնելու համար:
Արթուր Չախոյանը նշեց, որ առաջին սուտն այն է, թե իբր մանկապարտեզի տեսանյութում ինքը թաղապետին վիրավորել է։ Չախոյանը ներկայացրեց տեսանյութը, և որևէ բառ որևիցե մեկի հասցեին, այդ թվում՝ թաղապետի, չի ասվում։ Նա միացրեց տեսանյութը, որպեսզի տեսախցիկները դա ևս մեկ անգամ արձանագրեն:
«Ես որդեգրել եմ սկզբունք՝ երբևէ սուտ չեմ ասում, ներկայացնում եմ իրականությունը՝ փաստերով։ Հստակ նշվում է, որ այդ մանկապարտեզի աշխատանքներն ընդունված չեն, սակայն պետք է արդեն հանձնված լիներ»,-ասաց Չախոյանը:
Նա պնդեց, որ իր գործողությունների մեջ ոչ մի զրպարտանք, վիրավորական խոսք չկա, բայց թաղապետը զանգել է՝ հայհոյել ու սպառնացել, ինչի ձայնագրությունը հրապարկվել է, որն էլ նա հաստատել է և հետագայում հարցազրույցում հայտարարել, որ, այո՛, միտումնավոր է զանգել իրենց։
«Այսինքն՝ թաղապետը միտումնավոր է զանգել ինձ ու սպառնացել, այն դեպքում, որ ես որևէ վիրավորանք չեմ արտահայտել։ Հիմա ասեք՝ իմ կողմից սադրանքն ինչո՞ւմն է կայանում․ որ իրենց՝ այս իշխանության թալանն ու կոռուպցիա՞ն ենք բացահայտում»,-ասաց Չախոյանը։
Ակտիվիստը նշեց, որ շահարկվում էր, թե իբրև ինքն և Մանուկյանը պահանջել ենք թաղապետի հրաժարականը, սակայն նման բան չի եղել․ «Ես չէի էլ կասկածում, որ նրան աշխատանքից չեն հեռացնելու, որովհետև այս իշխանությանն այդ ամենը բնորոշ է»։
