«Ժողովուրդ» օրաթերթը գրում է.
«ԱԺ-ի «ընկերական գնումների» զավեշտն ու կոռուպցիոն շղթան երեկ բացահայտեց ԱԺ պատգամավոր Թագուհի Թովմասյանը, ինչին ի պատասխան` ԱԺ նախագահը փորձեց ստերով պաշտպանվել՝ այդպես էլ չասելով, թե ոսկե համրիչը՝ թզբեհը, ում համար է գնել:
Ազգային ժողովի անկախ պատգամավոր Թագուհի Թովմասյանը գլխավոր դատախազին ներկայացրեց հաղորդում ենթադրյալ հանցանքի մասին, որտեղ, ի թիվս այլ խայտառակ փաստերի, բացահայտեց, որ պետական գնումների թափանցիկության և հիմնավորվածության հարցը պետք է լուծվի:
Մասնավորապես, Թովմասյանը հայտարարեց, որ 2023-2025 թվականներին Ազգային ժողովին ծառայություններ է մատուցել «47 ԴԻԶԱՅՆ» ՍՊԸ-ն, որի տնօրենը՝ Արսեն Մելիքսեթյանը, Ալեն Սիմոնյանի ընկերն է:
Ըստ պատգամավորի` 2025թ. ԱԺ-ն գնել է 32,000 դրամ արժողությամբ փոքր արձանիկ «47 ԴԻԶԱՅՆ» ՍՊԸ-ից։
• 2024թ. հուլիսին 20 հուշամեդալ՝ ընդհանուր 950,000 դրամ արժողությամբ:
. 2023թ. կատարվել է առավել ուշագրավ գնում՝ ԱԺ-ն ձեռք է բերել ոսկե համրիչ՝ թզբեհ, 2 մլն 200 հազար դրամով:
Հաշվի առնելով այն հանգամանքը, որ գնումներն իրականացվել են ընկերությունից, որի ղեկավարն առնչվում է ԱԺ նախագահի հետ, պատգամավորն առաջ քաշեց հնարավոր շահերի բախման և պետական միջոցների ոչ թափանցիկ օգտագործման խնդիր։
Հիշեցնենք, որ «Պետական գնումների մասին» ՀՀ օրենքի համաձայն՝ պետական մարմինները պարտավոր են ապահովել մրցակցային ընթացակարգ, պատշաճ փաստաթղթավորում և հաշվետվություն։ Պայմանագրի բացակայության դեպքում գնումը կարող է դիտարկվել որպես օրենքի խախտում։
«Ո՞ւմ համար է գնվել ոսկե թզբեհը, ո՞վ է որոշել դրա անհրաժեշտությունը, ինչո՞ւ չկա հաշվետվություն… սրանք հարցեր են, որոնց պետք է պատասխանեն կոռուպցիայի դեմ պայքարող իշխանությունները», – հայտարարեց Թովմասյանը:
Ի պատասխան՝ Ալեն Սիմոնյանը բացատրություն չտվեց, թիրախավորեց «Ժողովուրդ» օրաթերթին (որի հիմնադիրն է պատգամավորը), ինչի պատասխանը կստանա փաստերով:
Մինչ այդ տեղեկացնենք, որ իր ելույթից հետո, երբ «Ժողովուրդ»-ի թղթակիցը մոտեցավ Սիմոնյանին, նա ասաց, թե նկատի չի ունեցել «Ժողովուրդ» օրաթերթին»։
Մանրամասները՝ «Ժողովուրդ» օրաթերթի այսօրվա համարում:
