«Ամեն ինչ էլ հնարավոր է». Աղազարյանը՝ վարչապետի պաշտոնում նախկին ՔՊ-ականի թեկնածու առաջադրելու մասին. «Իրավունք»
«Իրավունք» թերթը գրում է.
«Լիազորված եմ հայտարարել, որ նախաձեռնում ենք ՀՀ վարչապետ Նիկոլ Փաշինյանին անվստահություն հայտնելու գործընթաց (իմպիչմենտ): Այս մասին ֆեյսբուքյան իր էջում գրել է ՄԱՍԿ նախագահ Հովիկ Աղազարյանը, ինչու հիմա, ինչն է պատգամավորի մոտ վստահություն առաջացրել, որ նախաձեռնությունը կհաջողի, ով կլինի նրանց թեկնածուն, հարցերի պատասխանը փորձել ենք ստանալ անձամբ պատգամավորից, նախ հետաքրքրվելով՝ հնարավոր է իրենց թեկնածուն լինի նախկին ՔՊ-ական․
-Հնարավոր է, ամեն ինչ էլ հնարավոր է, մի շտապեք, մինչև մայիսի 21-ը համբերեք՝ կիմանաք։
-Վստահություն ունե՞ք, որ ՔՊ-ականները կմիանան Ձեր նախաձեռնությանը և այն կհաջողի։
-Այս պահին նման վստահություն չունեմ, բայց մենք չգիտենք, թե ժամանակի և փոփոխության մեջ ինչեր կարող են լինել, և իքս պահին ինչ անակնկալ իրավիճակներ կարող են լինել։
-Այդ դեպքում ինչո՞ւ հիմա նման նախաձեռնությամբ հանդես եկաք։
-Որովհետև մեր պետությունը գտնվում է կարևորագույն որոշումներ կատարելու նախաշեմին, և հետևաբար մենք պետք է փորձենք առավելագույնը անել այդ անհանգստությունների դեմն առնելու համար, այդ թվում վարչապետին իմպիչմենտ հայտնելով։
-Պարոն Աղազարյան, կցանկանայինք նաև Ձեր գնահատականը վերջին հարցուպատասխանին վարչապետի, մեղմ ասած, պատասխաններին։
-Բնականաբար, բացասական, բայց մի գաղտնիք բացեմ, իրականում վարչապետի վրդովվմունքը ոչ թե ընդդիմության ներկայացուցիչներին էր ուղղված, այլ հենց իր թիմի մի քանի պատգամավորների վրա, որոնց պատճառով ընդդիմությունը, փաստորեն վարչապետին նեղն է գցում։ Վարչապետը շատ լավ գիտի, որ իր շրջապատում կան կոռուպցիայի մեջ թաթախված անձիք։ Եվ իր զայրույթը ուղղված էր հենց դրանց, նա ուզում էր ասել, որ այ սրիկաներ Ձեր նմանների պատճառով ընդդիմադիրները ինձ փորձում են նեղը գցել, ես իրեն ճանաչելով վստահ եմ, որ դա ճիչ էր ուղղված իր թիմակիցներին, որ սթափվեն։
Առավել մանրամասն` թերթի այսօրվա համարում
