ՀՀ պարտավոր է ձևավորել այնպիսի միջավայր, որտեղ ուսուցիչն իրեն կզգա անվտանգ, արժևորված և ներշնչված՝ շարունակելու իր առաքելությունը. Հենրիխ Դանիելյան

ՀՀԿ երիտասարդական թևի ղեկավար Հենրիխ Դանիելյանը գրել է.

«Հայաստանում ուսուցիչը պետք է լինի պետության հատուկ ուշադրության և հարգանքի կենտրոնում։ Որպես սերունդներ կերտող, ազգային արժեքների փոխանցող և հասարակական բարոյականության հիմքեր դնող դերակատար՝ ուսուցիչն ունի բացառիկ առաքելություն՝ ձևավորելու պետության ապագա քաղաքացուն։

Անհանդուրժելի և խստորեն դատապարտելի են ցանկացած գործողություն կամ հռետորաբանություն, որոնք ուղղված են ուսուցչի արժանապատվության ոտնահարմանը, նրանց հասարակական հեղինակության նվազեցմանը կամ թիրախավորմանը։ Նման երևույթները հակասում են ինչպես ազգային արժեքային համակարգին, այնպես էլ պետության երկարաժամկետ զարգացման ռազմավարությանը։

Ցավալի է արձանագրել, որ վերջին տարիներին, ներկայիս իշխանությունների վարած քաղաքականության հետևանքով, հանրային դաշտում խաթարվել են կրթության և ուսուցչի նկատմամբ ձևավորված ավանդական հարգանքի ու վստահության հիմքերը։ Փաշինյանական բարքերը, որոնք միտված են արժեհամակարգի ապամոնտաժմանը, հանգեցրել են հասարակական վերաբերմունքի դեգրադացման, որի ցավալի արտացոլումը նկատվում է նաև ուսուցիչների նկատմամբ անհարգալից վերաբերմունքի աճով։

Ուսուցիչն ազգային գաղափարախոսության հենասյուներից է՝ միահյուսված մեր պատմության, մշակույթի և պետականության ամրապնդման գործընթացին։

Ուստի՝ նրա հանդեպ հարգանքի, աջակցման և պաշտպանության քաղաքականությունը պետք է դառնա ցանկացած պետական և հասարակական համակարգի առաջնահերթությունը։

Հայաստանի Հանրապետությունը պարտավոր է ձևավորել այնպիսի միջավայր, որտեղ ուսուցիչն իրեն կզգա անվտանգ, արժևորված և ներշնչված՝ շարունակելու իր առաքելությունը»։