Ավինյանը պնդել է, որ Նոր-Նորքի թաղապետը հեռանա. «Ժողովուրդ»
«Ժողովուրդ» օրաթերթը գրում է.
««Ժողովուրդ» օրաթերթը մայիսի 15-ին հրապարակել էր, որ Նոր Նորքի թաղապետ Տիգրան Տեր-Մարգարյանը հեռանալու է պաշտոնից: Երեկ պաշտոնապես հայտնի դարձավ այդ մասին:
Երևանի քաղաքապետ Տիգրան Ավինյանը, ըստ մեր վստահելի աղբյուրների, վերջին օրերին «բանակցային գործընթաց» է սկսել Նոր Նորքի վարչական շրջանի ղեկավար Տիգրան Տեր-Մարգարյանի հեռացման վերաբերյալ։
Պատճառը հանրային և քաղաքական բուռն վրդովմունք առաջացրած միջադեպն էր, երբ Տեր-Մարգարյանը եւ Նոր Նորքի մի խումբ աշխատակիցներ բռնության էին դիմել ակտիվիստ Արթուր Չախոյանի նկատմամբ՝ ուղիղ եթերում հարձակվելով նրա վրա, բառի բուն իմաստով՝ բռունցքներով լուծելով իրենց «վարչական խնդիրները»։ Դեպքից հետո վարչական վարույթներ հարուցվեցին ինչպես Արթուր Չախոյանի, այնպես էլ Տիգրան Տեր-Մարգարյանի նկատմամբ, սակայն վերջինս շարունակում էր պաշտոնավարել՝ փորձելով իր դիրքը պահել նաեւ քաղաքական հարթակում։
Նիկոլ Փաշինյանի քաղաքական թիմակիցները, ներառյալ՝ «Քաղաքացիական պայմանագիր» խմբակցության առաջնորդը, թերեւս հասկացել են, որ իրենց խորապես խոցելի են դարձնում նման դեպքերը, անպատժելիությունը:
Այս ֆոնին Տիգրան Ավինյանը կարողացել է կազմակերպել Տեր-Մարգարյանի հեռանալը:
Հիշեցնենք, որ «Հանրապետություն» կուսակցության ներկայացուցիչ Մալաթիա-Սեբաստիա վարչական շրջանի ղեկավար Ռոմիկ Մխիթարյանը բաց տեքստով ասել էր, որ եթե Տիգրան Տեր-Մարգարյանը հրաժարական տա, ապա ինքը և Դավիթաշենի թաղապետերն էլ կհեռանան:
Իսկ հիմա բանակցությունների արդյունքում «Հանրապետություն» կուսակցությունը Մարատ Սևոյանին կնշանակի թաղապետ»։
Մանրամասները՝ թերթի այսօրվա համարում:
