ՔՊ-ն պատրաստվում է ընտրության. Ե՞րբ հայտնի կդառնան ՔՊ ցուցակի առաջին 30 համարների անունները. «Հրապարակ»

«Հրապարակ» թերթը գրում է.

«Սեպտեմբերին սպասվում է «Քաղպայմանագրի» հերթական համագումարը, որի ժամանակ նաև նոր վարչություն են ընտրելու։ Նախորդ վարչության ընտրության դառը փորձը հաշվի առնելով՝ Նիկոլ Փաշինյանը մտադիր է ընդլայնել ընտրիչների թիվը՝ դրանով ավելի կառավարելի դարձնելով ընտրությունների արդյունքները:

Եթե անցած ընտրություններին վարչությունը ձևավորվեց հազար ընտրիչի կողմից, այս անգամ հնարավոր է կիսով չափ թիվն ավելանա։ Իսկ որքան մեծ լինի ընտրիչների թիվը, այնքան ընտրությունները կեղծելու հավանականությունը կփոքրանա, և այնքան ազդեցիկ կդառնա առաջնորդի կարծիքը։ Նախորդ անգամ մի խումբ ՔՊ-ականներ, մասնավորապես՝ Սուրեն Պապիկյանի մտերիմները, ազդել էին ընտրության ընթացքի և հաշվարկի վրա:

Կեղծիքը բացահայտեց Արսեն Թորոսյանը․ քվեարկության արդյունքների վերահաշվարկից հետո վարչության կազմից մի քանիսը դուրս եկան։ Նիկոլ Փաշինյանի համար կարևոր  է, որ վարչությունը լինի իր կողմից կառավարելի, և որևէ մեկն ավելի մեծ ազդեցություն չունենա, քան ինքը:

Ըստ կուսակցության ներքին կանոնադրության, հերթական ընտրությունների դեպքում համագումարն է ընտրելու նաև խորհրդարան ներկայացվելիք նախընտրական ցուցակի առաջին 30-ին, այսինքն՝ ՔՊ ցուցակի առաջին 30 համարների անունները հայտնի կդառնան սեպտեմբերին։

Առավել մանրամասն թերթի այսօրվա համարում