Ռուսաստանի հայերի միությունը ՌԴ ՔԿ-ին կոչ է արել արձագանքել Ադրբեջանի կողմից մարշալ Բաղրամյանի հուշարձանի պղծմանը
Ադրբեջանի իշխանությունների գործողություններին, որոնք Մեծ Հաղթանակի 80-ամյակի տարում ոչնչացրել են մարշալ Բաղրամյանի հուշարձանը և հետևողականորեն պղծում են Հայրենական մեծ պատերազմի (ՀՄՊ) հերոսների հիշատակը, պետք է պատշաճ գնահատական տրվի Ռուսաստանում։ Այս մասին ասվում է Ռուսաստանի հայերի միության (ՌՀՄ) հայտարարության մեջ։
Դրանում նշվում է.
«Մարտահրավերների թվում, որոնց մենք բախվում ենք վերջին տարիներին, խորհրդային ժողովրդի հերոսության և ֆաշիզմի դեմ տարած հաղթանակում նրա դերի մասին հիշողությունը վարկաբեկելու և ջնջելու փորձերն են, այդ թվում՝ խորհրդային զինվորների հուշարձանների ոչնչացման միջոցով։
ՌԴ Քննչական կոմիտեի տվյալներով՝ այսօր քննիչների վարույթում քրեական գործեր կան, որոնք քննվում են 15 եվրոպական պետությունների՝ Լատվիայի, Լիտվայի, Ուկրաինայի, Լեհաստանի, ԳՖՀ-ի, Չեխիայի, Հունաստանի, Ավստրիայի, Շվեյցարիայի, Ֆինլանդիայի, Էստոնիայի, Բուլղարիայի, Սլովակիայի, Ռումինիայի և Մոլդովայի տարածքում գտնվող խորհրդային զինվորների եղբայրական գերեզմանների, հուշարձանների և հուշահամալիրների պղծման, ոչնչացման կամ վնասման 167 փաստով։
Այս խայտառակ ցուցակի թեկնածու է վաղուց հանդիսանում Ադրբեջանը, որի իշխանությունները նպատակաուղղված քաղաքականություն են վարում՝ խորհրդային ժողովրդի կողմից ֆաշիզմի դեմ տարած հաղթանակի հերոսական էջերի հետ կապված հուշարձանների պղծման և ոչնչացման ուղղությամբ։ Մեծ Հաղթանակի 80-ամյակի տարում Ստեփանակերտում քանդվել է Խորհրդային Միության մարշալ, Խորհրդային Միության կրկնակի հերոս Հովհաննես Քրիստափորի Բաղրամյանի հուշարձանը։
Հայտնի է, որ Լեռնային Ղարաբաղը Հայրենիքին տվել է Խորհրդային Միության չորս մարշալ և ԽՍՀՄ նավատորմի երեք ծովակալներից մեկին՝ Հովհաննես Իսակովին։ Այժմ ոչնչացվել են այս լեգենդար խորհրդային զորահրամանատարների բոլոր հուշարձանները նրանց պատմական հայրենիքում, նրանց հարազատ գյուղերում, որոնք գտնվում են Ադրբեջանի վերահսկողության տակ։ Եզակի Չարդախլու գյուղում, որտեղ ծնվել և մեծացել են ապագա երկու մարշալները՝ Հովհաննես Բաղրամյանն ու Համազասպ Բաբաջանյանը, ինչպես նաև հարյուրավոր գեներալներ, ոչնչացվել են բոլոր հուշարձանները, ներառյալ Հայրենական մեծ պատերազմի թանգարանը։
Ռուսաստանի հայերի միությունը գնահատում է վանդալիզմի այս գործողությունները, մասնավորապես՝ Հաղթանակի լեգենդար զորավարի հայրենիքում Հովհաննես Քրիստափորի Բաղրամյանի հուշարձանի քանդումը, որպես Ադրբեջանի իշխանությունների և նրանց հովանավորների կողմից պլանավորված՝ խորհրդային ժողովրդի դերի արժեզրկման և պատմական փաստերի կեղծմանն ուղղված գործողության մաս, որի վերջնական նպատակը պատմական ճշմարտության խեղաթյուրումն է, բարոյական հիմքերի խարխլումը և սերունդների միջև ժառանգական կապի քայքայումը։
Բնութագրելով այս չարագործությունը որպես հակառուսական կենտրոնների կողմից կառավարվող և իրականացվող՝ համաշխարհային պատմությունը խմբագրելու և ԽՍՀՄ-ի ու նրա մեծ զավակների դերը վերանայելու նպատակով խորհրդային զորահրամանատարների պատվանդանները տապալելու քաղաքականության շղթայի օղակ, Ռուսաստանի հայերի միությունը դիմում է ՌԴ Քննչական կոմիտեին՝ համարելով, որ Ստեփանակերտում կատարված հանցագործության փաստով պետք է քրեական գործ հարուցվի «Ռուսաստանի զինվորական փառքի խորհրդանիշների պղծման, Հայրենիքի պաշտպանների հիշատակի հրապարակային անարգման» հիմքով»։
NEWSPRESS.am֊ի անձնակազմը մեկնում է արձակուրդ. աշխատանքները կվերսկսենք սեպտեմբերի 1-ից
