Թող ձեր քայլերն այնքան պայծառ լինեն, որ լռության միջից հնչի հույսի մի նոր ղողանջ. զոհվածի մոր շնորհավորանքը՝ շրջանավարտներին
44-օրյա պատերազմում զոհված հերոս Ժիրայր Մարգարյանի մայրը` Նաիրա Մարգարյանը, ֆեյսբուքյան իր էջում շնորհավորել է բոլորին շրջանավարտներին՝ Վերջին Զանգի կապակցությամբ:
Նա մասնավորապեես գրել է.
Սիրելի շրջանավարտներ,
Այսօր վերջին զանգի ղողանջն է հնչում ձեր համար՝ ինչպես մանկության վերջին երգը։ Դպրոցական տարիները վերածվում են հիշողությունների, իսկ դուք քայլում եք դեպի ապագա՝ ձեր մեջ կրելով անցյալի սուրբ ծիծաղը, ընկերության ջերմությունը և ուսուցիչների սրտացավ հայացքը։
Ձեր ճամփան նոր է սկսվում, ու թեկուզ ճանապարհը միշտ հարթ չի լինի, թող ձեր ներսի լույսը երբեք չմարի։ Եղեք նպատակասլաց, ուժեղ, բայց նաև բարի ու անկոտրում՝ ինչպես մեր հողը։ Թող յուրաքանչյուր դժվարություն դարձնեք փորձառություն, յուրաքանչյուր ձախողում՝ դաս։
Սակայն այս օրը թերի է... Արցախում լռություն է։
Չկան զանգեր, չկան բացվող դռներ, չկան շրջանավարտներ, միայն ցավ ու կարոտ։ Թող ձեր քայլերն այնքան պայծառ լինեն, որ լռության միջից հնչի հույսի մի նոր ղողանջ։
Ձեր ներսում ապրող հայրենիքը թող առաջնորդի ձեզ։
Բարի երթ, սիրելի շրջանավարտներ։
NEWSPRESS.am֊ի անձնակազմը մեկնում է արձակուրդ. աշխատանքները կվերսկսենք սեպտեմբերի 1-ից
