Արցախի խորհրդարանի նախագահ է ընտրվել Աշոտ Դանիելյանը

Մայիսի 21-ին Արցախի Հանրապետթյան Ազգային ժողովը արտահերթ նիստ է անցկացրել, որի արդյունքում ԱԺ նախագահ է ընտրվել «Ազատ հայրենիք» խմբակցության պատգամավոր Աշոտ Դանիելյանը:

168.am-ի հետ զրույցում Արցախի ԱԺ «Արդարություն» խմբակցության պատգամավոր Մետաքսե Հակոբյանն ասել է, որ մայիսի 21-ին լրացել էր Արցախի նախագահի պաշտոնավարման ժամկետը և, ըստ Սահմանադրության, մինչև նոր նախագահի ընտրությունները, նրա լիազորությունների կատարումն անցնում է ԱԺ նախագահին:

«Մեր գործընկեր Դավիթ Իշխանյանն այս պահին Բաքվի բանտում է: Ելնելով այս ծանր հանգամանքից, հասկանալի է, որ անելանելի իրավիճակ էր ստեղծվել, և հնարավոր չէր այդ գործառույթն իրականացնել: Հետևաբար, խիստ անհրաժեշտություն կար ԱԺ նոր նախագահ ընտրելու: Այս գործընթացը բավականին երկար ժամանակ փորձում էինք կազմակերպել։ Երկար ժամանակ Արցախի ԱԺ-ն, որպես այդպիսին, ելնելով նաև ներքին խնդիրներից, բավականաչափ կենսունակ չէր:

Երեկ պատգամավորների նախաձեռնությամբ տեղի ունեցած արտահեթ նիստի ժամանակ ԱԺ նախագահ ընտրվեց Աշոտ Դանիելյանը: 33 պատգամավորներից 28 պատգամավորները ներկա էին՝ բոլոր խմբակցություններից, 4-ը պատգամավոր հարգելի պատճառներով ներկա չէին։ 28 կողմ ձայնով խորհրդարանն ունեցավ նոր նախագահ՝ ի դեմս Աշոտ Դանիելյանի»,- նշել է Մետաքսե Հակոբյանը:

Նա նաև ընդգծել է՝ այս փոփոխությունների հիմքում շատ կարևորել են այն, որ խորհրդարանը լինի կենսունակ, կարողանա խնդիրները բարձրաձայնել և վերադարձի իրավունքը պատշաճ կատարել՝ բարձրացնելով տարբեր հարթակներում։