Զգուշացեք անծանոթ և անհայտ ծագման սնկեր օգտագործելուց

Հանրապետությունում 2015 թվականին արձանագրվել է սնկերի օգտագործման հետևանքով առաջացած թունավորման 35 դեպք` 47 տուժածով, որոնցից 2-ը մահվան ելքով: 2016 թվականին արձանագրվել է 2 դեպք` 8 տուժածով:

Առողջապահության նախարարության տրամադրած տվայլների համաձայն, թունավորումներն առաջացել են Արագածոտնի, Լոռու, Արարատի, Կոտայքի, Արմավիրի մարզերում` տուժածների կողմից հավաքված սնկերի օգտագործման հետևանքով:

Սնկից թունավորման նախնական ախտանշաններն են՝ սրտխառնոց, փսխում, լուծ, ցավեր որովայնի շրջանում, և գլխապտույտ: Դրանց ի հայտ գալուն պես անհրաժեշտ է անհապաղ դիմել բժշկի:

ՀՀ առողջապահության նախարարությունը խորհուրդ է տալիս`
• չհավաքել կամ չգնել և սննդում չօգտագործել անծանոթ և անհայտ ծագման սունկ
• չհավաքել սունկ, որն աճում է ավտոճանապարհների և երկաթգծերի մոտակայքում, քանի որ սնկում կուտակվում են թունավոր նյութեր, ինչը դառնում է օգտագործման համար ոչ պիտանի
• սննդում չօգտագործել հում սունկ
• սունկ գնել միայն շուկայից և խանութներից` իրավասու մարմնի կողմից տրված փաստաթղթի առկայության դեպքում
• չգնել խառը, չտեսակավորված սունկ: Չի թույլատրվում խառը սնկի վաճառքը, այն պետք է տեսակավորված լինի
• հղի կանանց, կերակրող մայրերին և երեխաներին խորհուրդ չի տրվում սննդում սունկ օգտագործել
• ցանկալի չէ սնկի օգտագործումն ալկոհոլի հետ, քանի որ սպիրտը նպաստում է օրգանիզմում թույների արագ ներծծմանը: