ՀՀ-ի ու Ադրբեջանի միջև խաղաղության հասնելու պատմական հնարավորությունը պիտի բաց չթողնվի. Փաշինյան

Մեր ռազմավարական որոշումն է մնալ հավատարիմ խաղաղության օրակարգին, և ես հույս ունեմ, որ այսօրվա զեկույցի ընթացքում կարողացա մեր միջազգային գործընկերներին ներկայացնել և ավելի տեսանելի դարձնել, թե ինչքան մոտ է խաղաղությունը Հայաստանի և Ադրբեջանի միջև։ Այս մասին, այսօր՝ մայիսի 26–ին, Ռոբերտ Ֆիցոյի հետ համատեղ ասուլիսի ժամանակ հայտարարեց ՀՀ վարչապետ Նիկոլ Փաշինյանը։

«Իհարկե, մենք լիարժեք և ամբողջական այդ մասով մեր պատասխանատվությունը կիրացնենք և ուրախ եմ արձանագրել, որ մենք նաև մեր խորհրդակցություններն ենք շարունակում Ադրբեջանի հետ, որպեսզի այս պատմական հնարավորությունը բաց չթողնվի, թույլ տվեք արտահայտեմ իմ համոզմունքը, որ բաց չի թողնվի, որովհետև, իհարկե, ոչ առանց դժվարությունների, բայց մենք շարժվում ենք առաջ, և այն փաստը, որ մենք այս միջավայրում միջազգային և տարածաշրջանային ոչ պարզ պայմաններում կարողացանք ավարտին հասցնել, հաջողությամբ փակել բանակցությունները խաղաղության համաձայնագրի նախագծի շուրջ, ունենալ համաձայնեցված տեքստ, որը պատրաստ է ստորագրման, դա իհարկե շատ կարևոր և շատ մեծ ձեռքբերում է, բայց քայլ է, որը պետք է ունենա շարունակություն։

Ուզում եմ շնորհակալություն հայտնել Սլովակիային, Սլովակիայի կառավարությանը և անձամբ վարչապետ Ֆիցոյին այս հարցում իրեն ցուցաբերած աջակցության համար, որովհետև Սլովակիան առաջին երկրներից էր, որ ողջունեց խաղաղության համաձայնագրի նախագծի շուրջ բանակցությունների ավարտը, համաձայնեցումը։ Սլովակիան, այն երկրներից է, որ սպասում է համաձայնագրի ստորագրմանը»,– ընդգծեց նա։