Ծարավ Աղբյուրի բնակիչները կանգառ գնալիս կամ աղբ թափելիս «մարզվում են»՝ գարշահոտ կոյուղաջրերի վրայով թռչելով (տեսանյութ, լուսանկարներ)

Երևանի Քանաքեռ-Զեյթուն վարչական տարածքի Ծարավ աղբյուր փողոցի բնակիչներն ահազանգում են՝ ավելի քան 10 օր է, ինչ դիտահորից կոյուղաջրերն առատ հոսում են փողոցով դեպի Թբիլիսյան խճուղի ու աղտոտում ողջ տարածքը։ Կեղտաջրի պատճառով փողոցը դարձել է դժվարանցանելի, իսկ տարածքը լցվել գարշահոտությամբ։

NEWSPRESS.am-ի հետ զրուցյում, բնակիչները նշեցին, որ խնդրին լուծում տալու համար զանգահարել են ջրմուղ․ «Վեոլիա ջուր» ընկերությունից նրանց պատասախանել են, թե՝ կգան, տեղում կուսումնասիրեն և կհասկանան, թե ինչ է կատարվում։

Ու քանի որ ընկերության կողմից չեն արձագանքել, բնակիչները փորձել են կրկին կապ հաստատել «Վեոլիա ջրի» աշխատակիցների հետ։ Վերջիններս ասել են, թե խնդիրն իբր ներքին ցանցի հետ է կապված և իրենք այդտեղ անելիք չունեն։

«Ասացին՝ էդ հարցը բնակիչներն են լուծելու, քանի որ ջրօգտագործողի բակում է խնդիրն առաջացել»,- ասաց մեր զրուցակիցը, և մեզ ցույց տվեցին, որ խնդիրը հենց փողոցում տեղադրված դիտահորի մեջ է։

NEWSPRESS.am-ը ևս կապ հաստատեց «Վեոլիա ջուր» ընկերության հետ, սակայն այդպես էլ չկարողացանք ստանալ հստակ պատասխան, թե որն է խնդիրը և ում գործառույթում է փողոցում տեղակայված դիտահորի սպասարկումը:

Հարկ է նկատել նաև, որ տարածքի բնակիչները դժվարանում են նաև աղբը թափել և այն ստիպված դնում են աղբամաններից քիչ վերև, քանի որ աղբամանին հասնելու համար պետք է թռչել կոյուղաջրերի վրայով։ Բացի այդ, կանգառ հասնելու համար, ևս պետք է ճարպկություն ցուցաբերել, որպեսզի չընկնել կոյուղաջրի մեջ։

Հրապարակմամբ ևս մեկ անգամ հրավիրում ենք պատկան կառույցի ուշադրությունը և ակնկալում հարցի շուտափույթ լուծում։

Արմինե Մկրտումյան