Ճանճը աթար է փնտրում, իսկ մեղուն՝ նեկտար. որքա՜ն են շատացել ճանճերը. Տեր Եղիշե քահանա Նուրիջանյան

րավունք ունի՞ երկրի առաջին խոսնակը՝ Ալեն Սիմոնյանը, ով ընդունակ է լկտիաբար թքել հայ մարդու վրա, հանդես գալու քրիստոնյայի դիրքերից և իբր թե սրտացավություն ցուցաբերել եկեղեցու հանդեպ, որին ինքը և իր որոշ թիմակիցներ միայն ու միայն վնասներ են պատճառել և պատճառում, այս մասին հայտարարել է Տեր Եղիշե քահանա Նուրիջանյանը։

«Քահանային հանեք եկեղեցուց և այն ժամանակ կտեսնեք, թե ինչ է կատարվում։

Առանց հոգևոր սպասավորի, մի քանի օրվա հարց է, որ որևէ եկեղեցին իր նշանակությունը փոխի և դառնա անճանաչելի։ Ինչպես որ անճանաչելի են դարձել եկեղեցական ճարտարապետությամբ շատ կառույցներ, որոնք պետական հոգածության ներքո են (համենայնդեպս, հոգածության ներքո պետք է որ լինեին)։

Եկեղեցին միայն շինություն չէ, այլ նաև ծես, պաշտամունք, աղոթք, օրհնություն, խնամք, հոգատարություն, որ կատարվում ու տարվում են այդ կառույցի ներսում։ Հանեք այդ ամենը, և ի՞նչ կմնա եկեղեցուց։ Ձև՝ առանց բովանդակության։

Եվ երբ եկեղեցականին եք ամբաստանում, եկեղեցականից եք բամբասում ու չարախոսում, դրանով ցույց եք տալիս, որ եկեղեցին ձեր կյանքում դերակատարություն ոչ ունեցել է, ոչ էլ ունի։

Դրանով ցույց եք տալիս, որ աստվածամարտ եք։

Իրավունք ունի՞ երկրի առաջին խոսնակը՝ Ալեն Սիմոնյանը, ով ընդունակ է լկտիաբար թքել հայ մարդու վրա, հանդես գալու քրիստոնյայի դիրքերից և իբր թե սրտացավություն ցուցաբերել եկեղեցու հանդեպ, որին ինքը և իր որոշ թիմակիցներ միայն ու միայն վնասներ են պատճառել և պատճառում։

Թե որքան է տևելու այս անառակությունը, միայն ինքը և իր նմանները գիտեն։

Մնում է հուսալ, որ չարի որոգայթների մեջ անդառնալիորեն չի խճճվի սեփական հռետորական արվեստով հպարտացող անձը և անվերադարձ կերպով իրեն դուրս չի դնի եկեղեցու խորհուրդներից։

Մայր եկեղեցու ճշմարիտ զավակը խնդիր նկատելիս հետաքրքրվում է՝ ինչպե՞ս օգտակար լինել և նպաստել խնդրի լուծմանը։

Իսկ չարի կամակատարը բացթողում է փնտրում, նկարում, հանրայնացնում և մեղավորներ նշանակում։

Ճանճը աթար է փնտրում, իսկ մեղուն՝ նեկտար։

Եվ ցավով ենք արձանագրում, թե որքա՜ն շատացել են ճանճերը»,- նշել է Տեր Եղիշեն։