Թեկնածուի անվան բացակայությունը ամենևին էլ խոչընդոտ չէ իմպիչմենտին. քաղաքագետ

«Ես նպատակ չունեի այս փուլում խոսել Նիկոլին հնարավոր փոխարինողի մասին` իմպիչմենտի նախաձեռնության կոնտեքստում: Բայց ընկերներիս հարցադրումները, թե իմպիչմենտի գործընթացին աջակցելու համար պետք է առաջին հերթին թեկնածու ունենալ կամ առնվազն` իմանալ թեկնածուի ով լինելը, ստիպեցին անդրադառնալ այս հարցին»,-գրում է քաղաքագետ Արմեն Մինասյանը։

Նա շարունակում է.

«Խիստ տրամաբանական թվացող այս փաստարկի հետ ես ինչ-որ տեղ համաձայն եմ, բայց նաև խնդիրը համարում եմ տեխնիկական: Ինչու՞:

Իմպիչմենտի գործընթացն, այո´, պահանջում է թեկնածուի համաժամանակյա առաջադրում: Բայց կարևորը գործընթացը նախաձեռնելն ու դրա տակ մտնելն է, թեկնածուի հարցը հեշտ լուծելի է:

Ոչինչ չի խանգարում, որ քաղաքական ուժը, որը հանձն կառնի, ընդգծում եմ` առայժմ ներքին նախաձեռնություն հանդիսացող այս գործընթացի պատասխանատվությունը, կարող է ինքնուրույն թեկնածու առաջարկել:

Օրինակ` իքս ուժը հանդես է գալիս հայտարարությամբ, որ քաղաքացի իգրեկին իմ պատասխանատվությամբ առաջարկում եմ որպես հետնիկոլական ստաբիլիզատոր, այդ գործիչը չի հավակնելու ոչնչի` բացի որոշակի էմ ժամանակահատվածում հանրային համերաշխություն ապահովելը, որը ներառում է` ա, բ, գ, դ:

Կամ` թեկնածուն որոշվում է ժամանակակից բառապաշարով ասած` ռանդոմ տարբերակով: Օրինակ` գործընթացին միացած ուժերը առաջարկում են սրտների ուզածի չափ տարբերակ, հետո որևէ մեխանիզմով ընտրվում է մեկը. մեխանիզմ կարող է լինել չինգաչունգը, ցելան, սպորտլոտոն, բլոտը, մարաթոնյան վազքը, գործնագործը, վոլեյբոլը կամ շաշկին: Ամենակարևորը` հնարավոր հավակնորդը չպետք է լինի ավելի վատը, քան գործող կառավարիչն է (գործնականում Նիկոլի ասած 3 միլիոն վարչապետացուների մեջ նման տարբերակը գրեթե անհնար է, բայց` ամեն դեպքում)

Մեկ այլ մեխանիզմ է դեմոկրատական ընթացակարգը կամ մասնակցային գործընթացը: Կարելի է թեկնածուին որոշել փրայմերիով, ֆեյսբուքյան քվեարկությամբ, սոցիոլոգիական հարցմամբ և այլն: Այսինքն մի մեխանիզմ, երբ հանրությանը կասվի, որ գիտես, սիրելի քաղաքացի, առաջնորդվել ենք քո նախասիրություններով:

Ասել կուզեմ, որ թեկնածուի անվան բացակայությունը ամենևին էլ խոչընդոտ չէ: Այն ավելի շատ գործընթացից խուսափելու իրական դրդապատճառները քողարկելու մարտավարություն է:

Այնպես որ, եթե որևէ մեկը ստանձնի գործընթացը, լավագույն թեկնածուին գտնելու հարցում, խոստանում եմ, որ ուժերին ներածին չափով ես էլ կօժանդակեմ»։