Հայաստանում հիմնականում գիրք գնում են 18-ից 35 տարեկանները. գրականագետ

Անկախությունից հետո Հայաստանում գրահրատարակչական գործը տարբեր տեղաշարժեր գրանցեց: Նախ հրատարկվելը դարձավ ավելի հեշտ, գրողները գիրք տպագրելու առումով գրեթե խնդիրներ չունեն, գուցե ֆինանսական, սակայն գիրք գնելու և ընթերցելու հարցը դարձավ քննարկման առարկա: Հատկապես մեղադրում են երիտասարդներին, որ գիրք չեն կարդում:

Newspress.am-ի հետ զրույցում գրականագետ Արքմենիկ Նիկողոսյանը խոսելով գրահրատարակչության և ընթերցանության խնդիրների շուրջ, նշեց, որ հաճախ է ավագ սերունդը խոսում՝ գիրք չեն գնում կամ գիրք չեն կարդում երիտասարդները:

Նա ներկայացրեց վիճակագրական տվյալներ, ըստ որոնց, գիրք գնողների 60-70 տոկոսը 18-ից 35 տարեկաններն են, գրադարան այցելողների 70-80 տոկոսը դարձյալ 18-ից 35 տարեկանները:

Գրականագետը երիտասարդների գործոնը զուգահառելով Հայաստանի սոցիալական վիճակի հետ, նկատեց, որ այս տարիքային խմբում այն երիտասարդներն են, որոնք ուսանողներ են, ունեն ֆինանսի խնդիրներ, նորավարտ համալսարանականները, որոնք դեռ աշխատանք չեն գտել, կամ նոր-նոր ընտանիք կազմողները, որոնք ունեն հիպոտեկի, բնակարանի, վարձի և այլ խնդիրներ, եթե ընտանքիում երեխա կա, ապա գիրք գնող երիտասարդը այս բոլորին գումարած նաև երեխայի հետ կապված բազմաթիվ ֆինանսական խնդիրների հետ միասին, նաև չեղած տեղից գիրք է գնում:

«Եթե այս սեգմենտը՝ 18-35, Հայաստանում լիներ ապահովված, բուհում ստանար նորմալ կրթաթոշակ, ավարտելուց հետո ունենար նորմալ աշխատեղ, ապա ավելի շատ գիրք կգներ»,- ասաց Ա. Նիկողոսյանը, հավելելով, որ Հայաստանում գիրք չգնելու պատճառներից հիմնականը սոցիալականն է: