Արցախի թեմի առաջնորդի գլխավորությամբ կքննարկվի Արցախ վերադարձի հարցը

Հայ Առաքելական Եկեղեցու (ՀԱԵ) Արցախի թեմի (ԱԹ) նախաձեռնությամբ իրականացվելու է փորձնական, բայց կարևոր ծրագիր՝ «Ամոքում վկայությունների միջոցով»։ Նախաձեռնության նպատակն է օգնել բռնի տեղահանված արցախցիներին, ներկայացնելով ճշմարտությունն ու իրենց տառապանքը՝ հասնել ներքին խաղաղության և քննարկել ապագային միտված քայլերն ու պայմանները, այդ թվում՝ Արցախ վերադարձը։

Հունիսի 2-ին Երևանում կայացավ առաջին հանդիպումը Արցախից բռնի տեղահանվածների և նրանց վկայությունները լսող փաստագրող հանձնաժողովի հետ։ Բացման և ողջույնի խոսքով հանդես եկավ ՀԱԵ ԱԹ առաջնորդ Վրթանես եպիսկոպոս Աբրահամյանը՝ ներկայացնելով նախաձեռնած ծրագրի կարևորությունը, հայտնելով, որ ծրագիրը մարդասիրական և հոգևոր ու մշակութային է։ Այն չունի որևէ քաղաքական ազդեցություն և բովանդակություն։ Վկայությունները և զրույցների ձայնագրությունները կմնան գաղտնի և չեն հրապարակվի՝ առանց հեղինակների հստակ համաձայնության։

Թեմակալ առաջնորդը շնորհակալություն հայտնեց հանդիպման հարցազրույցի մասնակիցներին և ներկայացրեց հանձնաժողովի կազմը՝ Կալիֆորնիայի դատավոր և Ճշմարտության ու արդարության կենտրոնի հիմնադիր Գասիա Ակպարյանին, Գերմանահայոց կենտրոնական խորհրդի ատենապետ, իրավապաշտպան Ջոնաթան Սպանգենբերգին, նշելով, որ «նրանք ընտրվել են իրենց բացառիկ փորձի, անկախության ու տուժած անձանց արժանապատվության նկատմամբ խոր հարգանքի համար։ Նրանց ներկայությունը երաշխիք է, որ մեր ձայնը հնչի արժանապատվորեն և պատշաճ ուշադրությամբ»։ Գործընթացը ղեկավարելու համար Վրթանես եպիսկոպոս Աբրահամյանը շնորհակալություն հայտնեց Լուիս Մորենո Օկամպոյին և Արտակ Բեգլարյանին՝ աշխատանքները համակարգելու համար. «Նրանց աջակցությամբ «Անցումային արդարադատության միջազգային կենտրոն»-ը և «Աֆեյան» հիմնադրամը մեզ տրամադրում են կարևոր խորհրդատվություն, որոնց ներկայացուցիչները կդիտարկեն գործընթացը»։

Այնուհետև հանձնաժողովի անդամները՝ դատավոր Գասիա Ակպարյանը և Ջոնաթան Սպանգենբերգը, ԱԹ առաջնորդի հետ լսեցին վկաներին, հարցեր ուղղեցին նրանց, ներկայացնելով նաև իրենց դիտարկումներն ու մոտեցումները ծրագրի վերաբերյալ։ Ծրագրին մասնակցում էին դիտորդներ՝ Արտակ Բեգլարյանը, Թալար Կազանջյանը և Մարիա Աբրահամյանը։ ՀԱԵ ԱԹ առաջնորդը շնորհակալություն հայտնեց նաև «Բարս մեդիա»-ին՝ նկարահանումների և «Շոա» հիմնադրամին՝ աջակցության համար։