Հայաստանում բարոյականության համակարգային ճգնաժամ է․ Դանիելյան

ՀՀԿ ԵԿ նախագահ Հենրիխ Դանիելյանը գրել է․

«Հայաստանում ձևավորվել է նորագույն պատմության ամենավտանգավոր երևույթը՝ բարոյականության համակարգային ճգնաժամը։ Իշխանության՝ տարիներ շարունակ իրականացված նպատակային քաղաքականության արդյունքում ոչ միայն խաթարվել են պետական ինստիտուտները, այլև քայքայվել է հանրային բարոյական միջավայրը՝ վերացնելով այն սահմանները, որոնք տարիներով պահում էին ազգային արժանապատվությունն ու արժեհամակարգը։

Այսօր Հայաստանում ամեն ինչ, ինչին երբեմն ասում էին «չի կարելի», դարձել է սովորական՝ մարդու խեղում, բռնություն լրագրողների նկատմամբ, ճնշում ընդդիմախոսների վրա, պետական մարմինների կողմից անձնական ազատությունների ոտնահարում։

Նույնիսկ այնպիսի երևույթներ, որոնք հարյուրամյակներով ընկալվել են որպես մշտական սրբություն, ինչպիսին է Հայ Առաքելական Սուրբ Եկեղեցին, դարձել են պետական քարոզչության թիրախ։

Բայց պատմությունը ցույց է տալիս, որ բարոյականության և ճշմարտության դեմ պատերազմող ռեժիմները դատապարտված են պարտության։

Հայ ժողովուրդը պատրաստվում է ազգային զարթոնքին, որը լինելու է համաժողովրդական և ներառական։

Այդ զարթոնքին միանալու են ոչ միայն այսօրվա ընդդիմադիրները, այլև նրանք, ովքեր նախկինում լռել են, վախեցել կամ պարտադրվել է լռել։ Այդ թվում՝ ոստիկանները, ովքեր մինչև վերջ չեն կորցրել հայրենիքի և արդարության զգացողությունը։

Սակայն նրանք, ովքեր բռնություն են գործադրել խաղաղ քաղաքացիների նկատմամբ, ինչպես՝ Մերի Մանուկյանի դեպքի ժամանակ, պետք է ենթարկվեն քրեական պատասխանատվության և պատասխան տան օրենքի առաջ։ Անպատժելիության շրջանառվող մոդելը պետք է կոտրվի՝ որպես նախապայման ազգային վերակառուցման։

Այն, ինչ մենք այսօր ապրում ենք, ցավոտ է, բայց ժամանակավոր։

Հայ ժողովրդի պատմությունը լի է վերածննդի օրինակներով։ Եվ ինչպես միշտ, ազգը հաղթելու է, երբ վերադառնա իր արմատներին, հավատքին, արժանապատվությանը և պատասխանատվության զգացումին»։