Համագործակցությունն առավել արդյունավետ է, երբ հիմնված է փոխադարձ հարգանքի և լսելու պատրաստակամության վրա. լրագրողներին չլսող ու նույն բառը կրկնող նախարարի խոսնակի պարզաբանումը

Արդարադատության նախարարի մամուլի խոսնակ Մարիամ Մելքումյանը հաղորդագրություն է տարածել, որում ասվում է.

«Համագործակցությունը լրատվամիջոցների հետ եղել և մնում է Արդարադատության նախարարության առանցքային առաջնահերթություններից։

Արդարադատության նախարարությունը մշտապես կարևորում է լրատվամիջոցների դերը՝ որպես հանրային կյանքի, ժողովրդավարության և իրավական գործընթացների կարևոր գործընկեր։

Այսօր Ազգային ժողովում տեղի ունեցած լարվածությունը, ցավոք, խոչընդոտեց բնական և կառուցողական հաղորդակցությանը։

Նախարարությունը վստահ է, որ պետական մարմինների և լրատվամիջոցների համագործակցությունն առավել արդյունավետ է, երբ հիմնված է փոխադարձ հարգանքի և լսելու պատրաստակամության վրա։

Հիշեցնում ենք, որ նախարարությունը բաց է երկխոսության համար և պատրաստ է ապահովել անհրաժեշտ ձևաչափեր՝ գործընկերային մթնոլորտի և արդյունավետ հաղորդակցության շարունակականության համար»,- ասված է հայտարարության մեջ: 

Հիշեցնենք, որ այսօր լրագրողների հետ ճեպազրույցում նախարարը որոշել էր իրեն թույլ տալ դասախոսություն կարդալ լրագրողների առաջ, չլսել նրանց հարցերը ու կրկնել «Սահմանադրությամբ» բառը: Եվ առնվազն տարօրինակ է, երբ փոխադարձ հարգանքի և առավել ևս լսելու պատրաստակամության մասին խոսում են այնտեղից, որտեղ նախարար աշխատողը հարցեր լսելու պատրաստ չէ: