Բարձրաշեն համայնքում ծիրանը 100 տոկոսով ցրտահարվել է

Արարատի մարզի Բարձաշեն համայնքում ծիրանենիները 100 տոկոսով ցրտահարվել են: Այս մասին newspress.am-ին ասաց Բարձրաշենի համայնքապետ Սուրիկ Սարգսյանը:

Նա նաև նշեց, որ մինչև վերջին ձյուն-անձրևը դեռ հնարավոր էր որևէ ակնկալիք ունենալ ծիրանենիներից, սակայն վերջին ցրտահարությունն իր գործն արեց, և համայնքն այլևս ծիրան չունի:

Համայնքապետը նաև փոխանցեց, որ Բարձրաշենն ապրում էր հիմնականում ծիրանենիներով, քանի որ ոռոգման ջուրը 20 օրը մեկ անգամ է տրվում համայնքին, այդ պատճառով հիմնական հույսը ծիրան էր: Ոռոգման բացակայության պատճառով բարձրաշենցիները բանջարաբոստանային կուլտուրաներ մշակել չեն կարողանում:

Բարձրաշեն համայքն ունի 26 հա ծիրանի այգիներ, և այս պահին հաշվարկում են վնասը, որպեսզի ներկայացնեն Արարատի մարզպետարան:

«Անգամ դեղձենին է վնասված, բացել եմ բողոջները` կոկոնների մեջ սառույց էր, իհարկե դեղձենին այդքան չի վնասվել, սակայն բերքը պակաս կլինի»,- ասաց Սուրիկ Սարգսյանը:

Եվ նաև հավելեց, որ 248 հոգի ամեն տարի մեկնում է արտագնա աշխատանքի, չբացառեց, որ այս տարի ևս արտագաղթի ճանապարհը շատերը բռնեն, քանի որ ապրելու հիմնական միջոցը՝ ծիրանը, այլևս չկա: