Կա քաղաքական աստառ, դա հերքել հնարավոր չէ. քաղաքագետը՝ մեծածավալ ձերբակալությունների մասին

Նիկոլ Փաշինյանը չի կարողանւմ հաղթահարել իր վախերն ու մեկընդմիշտ ազատվել դրանցից: Թերևս դա է պատճառը, որ նա շարունակում է շինծու մեղադրանքներ «փաթաթել» ընդդիմադիր գործիչների վզին ու ազատազրկել նրանց:

Գործարար Սամվել Կարապետյանին ձերբակալելուց և ԱԱԾ նկուղ ուղարկելուց հետո, Փաշինյանն անցել է «Սրբազան պայքար» շարժման անդամներին ու այդ շարժման առաջնորդ Բագրատ Սրբազանին՝ մեղադրելով նրանց հեղափոխություն նախաձեռնելու մեջ:

Վաղ առավոտից՝ խուզարկություններ, ձերբակալություններ ու կալանավորումներ:

Քաղաքագետ Արա Պողոսյանն այս ամենի մեջ քաղաքական ենթատեքստ է տեսնում:

«Այն, որ կա քաղաքական աստառ, դա հերքել հնարավոր չէ։ Քաղաքական իմաստով մենք կարող ենք կարծիքներ արտահայտել, բայց չափազանց կարևոր է իրավական մասը, և այդ մասով, ես կարծում եմ, շատ արագ ակնհայտ կդառնա, որ այստեղ կա քաղաքական ենթատեքստ», - NEWSPRESS.am-ի հետ զրույցում ասաց քաղաքագետը:  

Նրա խոսքով՝ այստեղ ավելի ենթատեքստային հանգամանքներ կան, որոնք կարող են իրար հետ շաղկապված լինել։  

«Բնականաբար, եկեղեցու դեմ այս ամբողջ արշավը չէր կարող այլ հանգուցալուծում ստանալ»,-ասաց Արա Պողոսյանը:

Նա նշեց, որ եկեղեցու դեմ հակաքարոզչությունը չէր տվել իր արդյունքը, և ակնհայտ էր, որ ուղղակի հարձակվելու են եկեղեցու վրա։

«Հետևաբար, պետք է գտնեին հնարավորություն, որը թույլ կտար եկեղեցուն մեղադրել պետական անընդունելի գործողությունների մեջ»,-ասաց Արա Պողոսյանը։ 

Ինչ վերաբերվում է նրան, թե՝ հնարավո՞ր է արդյոք ձերբակալությունների շղթան առիթ դառնա իշխանափոխության, ապա քաղաքագետը նկատում  է. «Եթե նույնիսկ մեկ հոգի մտածում է, որ այս ճանապարհով պետք է երկրում կազմակերպել իշխանափոխություն, նշանակում է, որ իրապես կա ներքաղաքական լրջագույն խնդիր, և այդ խնդիրը հնարավոր չէ հավերժ լռեցնել»: