Թե բա ԱԱԾ-ն մտել է Մայր Աթոռի տարածք․ չպիտի նման բան լինի․ դուք լուրջ սա աջակցո՞ւմ եք․․․ Հրանտ Տեր-Աբրահամյան

Թե բա ԱԱԾ-ն մտել է Մայր Աթոռի տարածք. գրել է պատմաբան, հրապարակախոս, Մարտական եղբայրության անդամ Հրանտ Տեր-Աբրահամյանը։

«Ի տարբերություն ձեզ, ես ինձ թունդ քրիստոնյա չեմ համարում ու ներկայացնում, սաղմոսներ ու Ավետարան չեմ մեջբերում (թեև, անտեղյակ չեմ նյութից)։

Եկեղեցու խնդիրը նոր չեմ իմացել ու հասկացել` 2019-20 թթ.-ին այդ խնդրի սահմանումներն ու իմ պատկերացրած լուծումները գրավոր եմ ձևակերպել, նաև` հրապարակային: Բնականաբար, էն ժամանակ ձեր մոտ «հեղափոխություն էր», ամեն բան լավ էր, նման խնդիրներով լուրջ զբաղվելու կարիք չէիք զգում:

Նույն Գարեգինի հրաժարականի թեման բարձրաձայնել եմ դեռ 2008 -ին` նաև փորձելով դա հիմնավորել պատմական օրինակներով:

Բայց:

էս ամենը գրեցի ոչ թե, որ տեսեք՝ ես ինչ դեմք եմ, այլ որ ճիշտ կոնտեքստի մեջ դրվի էսօրվա վերաբերմունքս:

ԱԱԾ-ն մտնում է Մայր Աթոռ` անկախ բոլոր պատճառաբանություններից ու հիմնավորումներից` ճիշտ թե սխալ, միայն էս վերնագիրը, միայն փաստը, որ անկախ Հայաստանի ուժային կառույցը մտնում է Մայր տաճարի տարածք, ինքին արժի տասը հատ հեղաշրջում ու հեղաշրջման մեղադրանք:

Չի կարող ու չպիտի նման բան լինի:

Ու դուք լուրջ սա աջակցում եք, լուրջ մտածում եք, որ եթե նույնիսկ խնդիր կա, կարող է խնդրի նման լուծում լինի, նման ձև լինի: Հարցը զուտ ձևը չի: Կամ սա այնպիսի ձև է, որ տասը հատ բովանդակություն արժի, ու բովանդակությունից կարևոր է:

Հետո, որ ասեմ, որ նեոբոլշևիկ եք, չնեղանաք, ընդունեք դա որպես ձեր ճակատին գրած դրոշմ:

Թե ինչու եք ընդհանրապես նեոբոլշևիկ, նոր չեմ ասում, համարեք գիտականորեն ապացուցված է արդեն:

Հնուց ի վեր՝ տաճարների տարածքը եղել է ապաստարան նույնիսկ ծանր հանցագործների համար` քանի տաճարում ես, իրավունք չկար քեզ ձեռք տալու:

Լավ, հինը ձեզ հիմնավորում չի:

Իսկ նորում` Մայր Աթոռի տարածք կարային մտնեին ցարի կազակները, Ստալինի նկվդեշնիկները, բայց ոչ հայկական ուժային կառույցը:

Ձեր Իրական` Սովետական Հայաստանը ձեզ ուտի` իրա ամեն ինչով, իրա ռուս-թուրքական դաշինքով գծած սահմաններով:

Ի դեպ, բոլշևիկներն էլ էին շատ թունդ պայքարում ռուսական իմպերիալիզմի դեմ: Դե վերբալ մակարդակում»,-գրել է նա: