75 միլիոն դրամ արժողությամբ տուն` Ծաղկաձորում, 2022-ի արտադրության Tesla. Արսեն Թորոսյանի հայտարարագիրը

ԱԺ ամբիոնից հայհոյանքներ հնչեցնող, ՀՀ առողջապահության նախկին նախարար, այժմ ԱԺ առողջապահության հարցերի մշտական հանձնաժողովի նախագահ Արսեն Թորոսյանը ներկայացնել է իր 2024 թվականի անշարժ գույքի և եկամուտների մասին հայտարարագիրը:

Դրանից տեղեկանում ենք, որ Թորոսյան  ունի մեկ անհատական բնակելի տուն (համատեղ օգտագործման, որը ձեռք է բերել 2011 թվականին) և հողամաս, որը ձեռք է բերել 2020 թվականին՝ գնման եղանակով։ Իսկ ահա հաշվետու 2024 թվականի ընթացքում Թորոսյանը ձեռք է բերել բնակարան Ծաղկաձորում՝ 75,000,000 դրամով։ Հաշվետու տարվա վերջում անշարժ գույքերը պահպանվել են։

Թեև Թորոսյանը չի նշել, որ ձեռք է բերել կամ տվյալ տարվա վերջում ունեցել է տրանսպորտային միջոց, սակայն «հայտարարատուի կողմից տվյալ տարվա ընթացքում 90 օրից ավելի փաստացի տիրապետվող տրանսպորտի միջոց կամ հայտարարատուի անունից, օգտին կամ հաշվին ձեռք բերված, երրորդ անձին սեփականության իրավունքով պատկանող տրանսպորտի միջոց, կամ տրանսպորտի միջոց, որից փաստացի օգուտ է ստանում կամ այն տնօրինում է հայտարարատուն» սյունակում Թորոսյանը նշել է 2022-ի արտադրության Tesla մակնիշի ավտոմեքենա, ինչը թույլ է տալիս ենթադրելու, որ նա շահագործում է այդ մեքենան:

ԱԺ առողջապահության մշտական հարցերի նախագահը 2023 թվականին ձեռք է բերել «Տելեկոմ Արմենիա» ԲԲԸ-ի արժեթղթեր՝ 1 մլն 30 հազար դրամի, որը տարվա վերջում զրոյացվել է։

Մյուս նմանատիպ գործարքը դարձյալ 2023-ին է եղել, Թորոսյանը ձեռք է բերել UniCredit Bank Austria AG արժեթուղթեր՝ 49 հազար 500 եվրոյով, որը տարվա վերջում դարձել է 50 հազար 500 եվրո։  

Տարվա սկզբում և վերջում Թորոսյանի հանձնված և վերադարձված փոխառություններից մեկը կազմել է 15 մլն 750 հազար դրամ, մյուսը՝ 1 մլն 750 հազար դրամ։

Պատգամավորի եկամուտը հաշվետու տարվա ընթացքում կազմել է 13 մլն 491 հազար դրամ, որից 10 մլն 20 հազար դրամը ԱԺ-ից ստացված աշխատավարձի գումարն է։

Հաշվետու տարվա դեկտեմբերի 31-ի դրությամբ Արսեն Թորոսյանի հիփոթեքային վարկի մայր գումարը կազմել է 15 մլն 470 հազար դրամ:

2 մլ դրամը կամ դրան համարժեք արտարժույթը գերազանցող այլ միանվագ ծախսերի թվում Թորոսյանը նշել է  7000 եվրո և 3.088.960 դրամ: