Պետությունը չպետք է խառնվի եկեղեցու գործերին. Բաբայան

Իշխանության ու մասնավորապես Նիկոլ Փաշինյանի կողմից Հայ առաքելական եկեղեցու դեմ սկսած արշավը դեռ չի ավարտվել: Ըստ ամենայնի, նա կանգ չի առնի 2 Սրբազանի կալանավորմամբ՝ հաշվի առնելով, որ թիրախում Ամենայն Հայոց Կաթողիկոսն ու կրոնն է:

NEWSPRESS.am-ի հետ զրույցում, Հովհաննես Թումանյանի անվան տիկնիկային թատրոնի գեղարվեստական ղեկավար, ռեժիսոր Ռուբեն Բաբայանն, անդրադառնալով ստեղծված իրավիճակին, ասաց՝ ճիշտ ճանապարհը սահմանադրական դաշտ վերադառնալն է, որտեղ եկեղեցին անջատված է պետությունից, և պետությունը չպետք է խառնվի եկեղեցու գործերին։

«Անկեղծ ասած՝ այս պատմության մեջ մի քիչ այլ երանգ եմ տեսնում։ Ես չեմ կարծում, որ սա պայքար է եկեղեցու դեմ, առավել ևս կուսակրոնության դեմ։ Ես կարծում եմ, որ այստեղ տեղի են ունենում Մոսկվայի ագենտուրայի ցանցի բազահայտում, մենք կարծես թե աննկատ թողեցինք Ազգային անվտանգության ծառայության ղեկավարի պաշտոնից հեռացումը։ Նրան հեռացնում են այն ժամանակ, երբ տապալում է ինչ-որ աշխատանք։ Այս ամենի մասին վարչապետը չի կարող բարձրաձայնել, դրա համար ընկել է նման մեղադրանքների մեջ»,- իր ենթադրություններով կիսվեց նա։

Բաբայանի կարծիքով՝ խնդիրն այստեղ իշխանափոխությունը չէ, այլ խնդիրն այն է՝ եթե կատարվում է իշխանափոխություն, դեպի ուր տանել։

«Իշխանափոխություն այսպես թե այնպես պիտի լինի, դա բնական պրոցես է։ Ուրիշ խնդիր է, որ իշխանափոխությունը կարող է կատարվել ուրիշ երկրի կամքով»,- հավելեց Բաբայանը։