Թռնեք օդ, իջնեք ներքև, սա հենց ՀԷՑ-ը խլելու նախագիծ է. հրատապությունն առաջացավ Սամվել Կարապետյանի հայտարարությունից հետո. Գրիգորյանը` փոխնախարարին

Ռազմավարական նշանակության հարց է բերվել ԱԺ նիստի օրակարգ, և Դուք առաջարկում եք այն 24 ժամյա ռեժիմով քննարկել. ՀԷՑ-ի խլման գործընթացն  իրականում շատ մեծ բացասական ազդեցություն է ունենալու ներդրումային ընդհանուր մթնոլորտի վրա: Այս մասին այսօր Ազգային ժողողում, դիմելով ՏԿԵ փոխնախարար Արմեն Սիմոնյանին՝ ասաց ԱԺ «Հայաստան» խմբակցության պատգամավոր Աննա Գրիգորյանը: 

«Հիմա ասում եք` սա հրատապ կերպով քննարկենք: Ինչո՞ւ հրատապ. իմ պատասխանն, օրինակ,  այն է, որ եղել է Սամվել Կարապետյանի հայտնի հայտարարությունը եկեղեցու պաշտպանության մասով և դա հրատապություն է առաջացրել կառավարությունում: Եթե այս մոտեցման հետ համաձայն չեք, հետևաբար հիմնավորեք, թե որն է պատճառը, որ մենք այս նախագիծը պետք է հրատապ կերպով քննարկենք»,- հարցրեց Գրիգորյանը:

Պատասխանելով` ՏԿԵ փոխնախարարը նշեց, որ Գրիգորյանի նշած «ՀԷՑ» և «խլել»  բառերը նախագծում առկա չեն` ինքը ծանոթացել է նախագծին: 

«Դա վերաբերում է ընդհանուր առմամբ էներգետիկ ոլորտին` որպես ռազմավարական նշանակություն ունեցող ոլորտ, բարեփոխումների շարունակականությանը: Ես վստահ եմ, որ բոլորդ տեղյակ եք, որ այս ոլոտում մենք ունենք բազմաթիվ խնդիրներ, այդ թվում` էլեկտրաէներգիայի մատակարարման հետ կապված, և դրանց մասին նույնիսկ խոսելու կամ ինչ-որ բան ապացուցելու կարիք էլ չկա: Ռազմակավարական ոլորտը հաշվի առնելով` մենք կարծում ենք, որ նման հարցերին պետք է հրատապ լուծումներ տալ, դրա համար էլ այս նախաձեռնությունն այսօր ձեզ ներկայացվում է»,- ասաց փոխնախարարը: 

«Թռնեք օդ-իջնեք ներքև, սա ՀԷՑ-ը խլելու մասին նախագիծ է, ինչքան էլ գեղեցիկ ձևակերպումներով փորձեք փաթեթավորել: Օրենքի նախագծի էությանը և բովանդակությանը մենք քննարկման ժամանակ կանդրադառնանք: Ձեզանից պահանջվում էր ասել, թե որն է հրատապությունը: Եթե հրատապության ձեր հիմնավորումն այն է, որ դուք տեսնում եք խնդիրներ ՀԷՑ-ում` հենց էսօ՞ր դա տեսաք, երե՞կ դա տեսաք, մի ամիս առաջ, մի տարի առաջ, երկու տարի առաջ չէիք տեսնում, հենց էսօ՞ր որոշեցիք հրատապ կերպով ներկայացնեք»,- դիտարկեց պատգամավորը:

Նախարարը նշեց, որ խնդիրներն այսօր չեն առաջացել էներգետիկայի ոլորտում, և ասել, որ այսօր են խնդիրներն առաջացել, այսօր են հրատապության հիմքով քննարկում, ճիշտ չէ:

«Խնդիրները  վաղուց կան, բայց մի օր, և կարծում եմ` սա այդ օրերից մեկն է, այդ խնդիրներին պետք է արագ լուծում տալ»,- եզրափակեց Սիմոնյանը: