Այստեղ ընդհանրապես քրեական գործ չկա, իրավական աբսուրդ է․ Վարդևանյանը՝ Սամվել Կարապետյանի գործի մասին

Սամվել Կարապետյանի գործը մի առանձնահատկություն ունի, այստեղ ընդհանրապես քրեական գործ չկա, քանի որ մեղսագրվում է արարք, որը ենթադրում է հստակ իշխանության զավթման կոչ, մինչդեռ, տվյալ դեպքում՝ ընդհանրապես առկա չէ գործ։ Այսինքն՝ քրեական գործ՝ կոչի վեաբերյալ՝ կոչի բացակայության պայմաններում, ինչն իրավական աբսուրդ է։ Այս մասին լրագրողների հետ զրույցում ասաց գործարար, բարերար Սամվել Կարապետյանի պաշտպանական խմբի անդամ Արամ Վարդևանյանը։ 

«Աբսուրդն, իհարկե, ունի ակունք։  Բոլորս հիշում ենք, թե ինչ սկսեց կատարվել հունիսի 17-ին։ Տեսանք, թե ինչպես է գործադիր իշխանության ղեկավարը ֆեյսբուքյան էջի միջոցով ներկայացրեց այնպիսի խոստումներ, որոնք ուղղված էին Սամվել Կարապետյանի նկատմամբ հաշվեհարդարին»,- ասաց Վարդևանյանը՝ հավելելով, որ դա աննախադեպ է, հենց այդ պահից էլ սկսել է քաղաքական հետապնդումը։ 

Վարդևանյանի դիտարկմամբ՝ ակնհայտ է, որ այս ամենը սկսվեց նաև այն ամենից ելնելով, որ Սամվել Կարապետյանը հայտնեց իր վերաբերմունքը՝ ՀԱՍԵ-ի, Մայր Աթոռի շուրջ տեղի ունեցող իրադարձությունների վերաբերյալ, ինչի հետ համակարծիք է նաև սույն գործով քննիչը, քանի որ դատարան ներկայացված կալանավորման միջնորդությամբ  նշված է «Սամվել Կարապետյանի կողմից հնչեցված խոսքերին նախորդել էին իրադարձություններ, այն է՝  ՀՀ գործադիր իշխանության դիրքորոշումը՝ Ամենայն Հայոց Կաթողիկոսի փոփոխության վերաբերյալ»։