Եթե Փաշինյանը, Աստված չանի, Սյունիքն էլ հանձնի, Արարատի մարզն էլ` մարսելու է, որովհետև այլընտրանքն իր հենարան խորհրդարանական ընդդիմությունն է. Սուրեն Պետրոսյան

Ընդդիմության մեջ քաղաքական ու որակական առումով ոչ մի տարբերություն չկա։ Մեկը ծնել է մյուսին, մյուսը` պահում է մեկին։ Այս մասին NEWSPRESS.am-ի հետ զրույցում ասաց «Ժողովրդավարական համախմբում» կուսակցության նախագահ Սուրեն Պետրոսյանը` պատասխանելով հարցին, թե` համամի՞տ է այն տեսակետին, որ իշխանությունն օրակարգ է թելադրում, իսկ ընդդիմությունն իր արձագանքով լցնում է այդ օրակարգը։

Սուրեն Պետրոսյանը, ոչ մի առումով, իշխանության և ընդդիմության մեջ ոչ մի տարբերություն չի տեսնում։

«Այս ամբողջ ընթացքում իշխանությունը միշտ օրակարգ է թելադրում։ Իսկ ընդդիմությունը ֆոնն ապահովող է` ընդամենը արձագանքողը»,- ասաց Պետրոսյանը։

Նա իշխանության գործունեության վերջին 5 տարվա աշխատանքը 99%-ով հակապետական է գնահատում։ Ավելին` նա իշխանությանը համարում է երկրի անվտանգության համար բացառիկ սպառնալիք։

«Մինչ օրս, ինչ հակապետական գործունեություն իշխանությունն արել է, կարողացել է անել ու մարսել, քանի որ այլընտրանք եղել է խորհրդարանական ընդդիմությունը։ Հետևաբար, ՀՀ-ում փոխհամաձայնեցված խմբիշխանություն է»,- ասաց Պետրոսյանը։

Նրա խոսքով` արտաքին քաղաքականության մեջ իշխանության հենարանը թուրքական աշխարհն է, իսկ ներսում` ընդդիմությունը։

«Դրա համար ասել եմ ու ասում եմ` մինչև չլինի ընդդիմափոխություն` չի լինի իշխանություն»,- ասաց մեր զրուցակիցը։

Նա իշխանափոխության համար կարևորում է ոչ թե գործիքակազմը, այլ դերակատարը։ Ըստ Սուրեն Պետրոսյանի` եթե ցանկացած հակաիշխանական գործընթացում ներգրավվում է խորհրդարանական ընդդիմությունը, ուրեմն միանգամից կարելի է հասկանալ` դա իշխանական օրակարգ է։

Թե ինչ միջոցով և ինչպես կարելի է հասնել իշխանության` Սուրեն Պետրոսյանը 2024 թվականին սկիզբ առած շարժման իր օրինակն ունի։ Նա հիշեցնում է այդ թվականի մայիսի 9-ը, որը այլ ուղղություն ստացավ, բայց նա չի կարծում, թե նույն ձևով կարելի է կրկնել այն։

«Փոփոխության հասնելու համար կա երկու պլատֆորմ` ժողովրդական և ընդդիմադիր։ Եթե ընտրում եք խորհրդարանական ընտրությունը` հույս չունենաք, որ փոփոխություն կլինի, իսկ ժողովրդի միջոցով կարելի է հասնել դրան»,- ասաց Պետրոսյանը։

Հարցին, թե ինչպե՞ս է պատկերացնում ժողովրդին` որպես պլատֆորմ, եթե նույն այդ ժողովրդին, իր իսկ նշած ընդդիմությունը մաշեց փողոցներում ու մի քանի անգամ հուսախաբ արեց` կուլմինացիոն պահին տուն ուղարկելով, Պետրոսյանն արձագանքեց, որ դրա համար ժամանակ է պետք։

Հարցին, թե` առաջարկում է սպասել մինչև 2026֊ի ընտրությունների՞ն, մեր զրուցակիցը նշեց։

«Ամեն ինչ տանում է դրան, բայց կարելի է ստանալ ժողովրդի աջակցությունը։ Իսկ այն, որ ժողովուրդը հուսահատվել է` կեղծ օրակարգ է։ Տեսեք` մարդիկ այս 5 տարվա մեջ քանի անգամ են դուրս եկել։ Հուսահատվել են, տուն են ուղարկել, բայց դուրս են եկել։ Ի վերջո, խորհրդարանական ընդդիմությունը և իշխանությունը կոնսենսուս ունեն` թույլ չտալ ձևավորել 3֊րդ ուժ, եթե մենք սա հաղթահարեցինք` արդյունք կունենանք։ Իսկ այս պարագայում եթե Նիկոլ Փաշինյանը, Աստված չանի, Սյունիքն էլ հանձնի, Արարատի մարզն էլ հանձնի` մարսելու է, որովհետև այլընտրանքը առաջին  նախագահն է, երկրորդ նախագահն է և երրորդ նախագահն է և «Դաշնակցությունը»։ Մենք այս շղթան պետք է կոտրենք»,- ասաց Սուրեն Պետրոսյանը։

Արմինե Մկրտումյան