ՀՀ–ում անհուսալի վարկերի մարման ծրագրի շրջանակում ավելի քան 14 500 դիմում է ստացվել

ՀՀ աշխատանքի և սոցիալական հարցերի նախարարությունը 14 757 դիմում է ստացել անհուսալի վարկերի մարման ծրագրի շրջանակում։ Ասուլիսի ժամանակ այս մասին հայտնեց նախարարության կենսաթոշակային ապահովության և այլ դրամական վճարների վարչության ընտանիքներին տրվող նպաստների բաժնի պետ Արմեն Մարգարյանը

«14 757 դիմումից շուրջ 4 400–ը հաստատվել է, իսկ 2025 թ․ հունիսի տվյալներով՝ մոտ 3300–3400 դիմում արդեն ուղարկվել է փոխհատուցման։ Այս պահին ծրագրի շրջանակում ծախսվել է 398 միլիոն դրամ։ Այս ամիսների ընթացքում ունենք կարևոր ցուցանիշ՝ աշխատանքի ընդունվել է 1000 շահառու, որոնք մասնակցել են ծրագրին և դարձել աշխատող», – ասաց Մարգարյանը։

 

Նա հստակեցրեց` 14 757–ը դիմումների թիվն է, ոչ թե անձանց, քանի որ մեկ անձը կարող է մի քանի անգամ դիմել։

 

Հիշեցնենք` կառավարության աջակցության ծրագիրը հաստատվեց 2024 թվականի դեկտեմբերին։ Անհուսալի վարկեր ունեցող անձանց տնտեսական ակտիվության խթանման միջոցառման շահառուների աշխատավարձից բռնագանձվող գումարը 20% է՝ 24 ամիս ժամկետով։ Ըստ ՀՀ կենտրոնական բանկի տվյալների` 2024թ հոկտեմբերի 1-ի դրությամբ անհուսալի վարկ ունեցող ֆիզիկական անձ վարկառուների թիվը շուրջ 341 հազար է, իսկ նրանց վարկային բեռը՝ շուրջ 642 մլրդ դրամ։

 

Կառավարության ծրագրով շահառու կարող են լինել անձինք, որոնց վարկն արդեն 3 տարի է, ինչ անհուսալի է և չի գերազանցում 1 մլն դրամը: Ծրագրին դիմող քաղաքացու աշխատանք ունենալը պարտադիր պայման է։ Դիմումների ընդունումը մեկնարկել է 2025 թվականի փետրվարից, վերջնաժամկետը 2026 թ.–ի հունվարի 31–ն է։