Ալիևի հետ հանդիպումից հետո Փաշինյանը «հարվածեց ղարաբաղցի անջատողականներին». ադրբեջանական ԶԼՄ-ներ

Ադրբեջանական ԶԼՄ-ները շարունակում են անդրադառնալ ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի՝ օրերս Աբու Դաբիում կայացած հանդիպմանը:

Ադրբեջանական մասմեդիայի գլխագրերում և հրապարակներում, ինչպես սպասվում էր և կանխատեսվում, երկու առաջնորդների բանակցությունները ներկայացվում են  
բացառապես իրենց ձեռնտու լույսի ներքո:

«Աբու Դաբիում կայացած հանդիպումից հետո Փաշինյանը հարված հասցրեց ղարաբաղցի անջատողականներին»:

Նման վերտառությամբ հոդված է հրապարակել ադրբեջանական իշխանամերձ քարոզչակայքերից Մինվալ-ը:

«ՀՀ գլխավոր դատախազությունը դատական հայց է ներկայացրել՝ պահանջելով անվավեր ճանաչել Արցախի ներկայացուցչության շենքի նկատմամբ 2017 թվականին գրանցված սեփականության իրավունքը։ 

Պատասխանողը Պետական կադաստրի կոմիտեն է։

Ղարաբաղի անջատողական ռեժիմը պաշտոնապես լուծարվել է 2023 թվականի սեպտեմբերին, սակայն նրա ներկայացուցիչները տեղափոխվել են Երևան և շարունակում են ռևանշիստական հայտարարություններ անել»,-Բաքվի ռեժիմին հատուկ ոգևորությամբ գրում է հոդվածագիրը։

Ըստ հրապարակման, «հատկանշական է, որ շենքից նրանց զրկելու որոշումը կայացվել է անցյալ շաբաթ՝ Աբու Դաբիում Ադրբեջանի և Հայաստանի ղեկավարների միջև կայացած բանակցություններից հետո»։ 

«Ըստ երևույթին, Բաքուն այս հարցը բարձրացրել է հանդիպման ժամանակ, և Երևանը ստիպված է եղել արձագանքել։

Նախկինում Երևանի կենտրոնում տեղակայված անջատողականները /խոսքը Արցախի պաշտոնական և քաղաքական գործիչների մասին է - խմբ./ թույլ էին տալիս իրենց կտրուկ հարձակումներ իրականացնել Ադրբեջանի դեմ, ինչը Բաքվում դժգոհություն առաջացրեց և կասկածի տակ դրեց Երևանի անկեղծությունը խաղաղ բանակցությունների գործընթացում»,-եզրափակում է հոդվածագիրը։

Չնայած Ալիևյան բռնապետական և հայատյաց ռեժիմի սազանդար-ԶԼՄ-ների նմանատիպ հրապարակումների ակնհայտ թունավոր արտանետումներին, ցավալի է, որ Փաշինյանի քայլերն իրապես վկայաբերած տրամաբանության տիրույթում են, որքան էլ չուզենք...