Արցախի պետնախարարին պատկանող բեռնատարներն ու վարորդներին տեղափոխել են ՊԵԿ

Քաղաքացիական հագուստով անձինք մոտեցել են Արցախի պետնախարար Նժդեհ Իսկանդարյանի վարորդ ընկերներին, նստեցրել մեքենա և տեղափոխել անհայտ ուղղությամբ: Այս տեղեկությունը ABC media-ին հայտնել է Նժդեհ Իսկանդարյանը:

Ավելի ուշ նրան տեղեկացրել են, որ վարորդները ՊԵԿ-ում են, բայց նրանց թույլ չեն տալիս կապի դուրս գալ, ոչ էլ հիմքեր են ներկայացնում  թե ինչ պատճառներով են տեղափոխել։ Արցախի պետնախարարը տեղի ունեցածը պայմանավորում է վերջին հանրահավաքով, և նշում, որ դրանից հետո նման դեպքերը հաճախակի են դարձել: Այսօր էլ Իսկանդարյանը զանգ է ստացել Աբովյանի քննչական կոմիտեում քննվող գործի առնչությամբ, որն, ըստ էության, 6 ամիս առաջ փակված է եղել:

«Արցախում ես շինարարությամբ էի զբաղվում, այստեղ տեղափոխվելուց հետո հնարավորություն եմ ունեցել գործը վերսկսելու: Պայմանների չհամապատասխանելու պատճառով ոչ տենդերներին ենք մասնակցել, ոչ էլ կանխավճար ենք ունեցել, բայց  վարկ եմ վերցրել՝ բեռնատարներ ձեռք բերելու նպատակով։

Հիմա ինչ-որ  X կազմակերպությունում վարձով են տրված այդ մեքենաները ու հենց այդ կազմակերպության դիմաց քաղաքացիական հագուստով մարդիկ մոտենում են, կանգնեցնում իմ երկու մեքենաները ու տղաներին տեղափոխում: Մեկ ժամ անց տանում են նաև երրորդ վարորդին»,- պատմել է պետնախարարը։