Ինչ են հանել քննիչերը «Ռիբոկ»-ից և «Գոլդս ջիմ»-ից

Հարկեր, տուրքեր թաքցնելու քրեական վարույթների շրջանակում իրավապահները երեկ քննչական գործողություններ էին իրականացնում «Ռիբոկ» և «Գոլդս ջիմ» մարզասրահներում։ «Հրապարակը» երեկ արձանագրել էր՝ քննչական գործողությունների ավարտին քննիչները «Ռիբոկ»-ում համակարգիչների էին կապարակնքել։ Քննչական կոմիտեից մեզ հայտնեցին, որ քրեական վարույթի շրջանակում կատարված գործողությունների արդյունքում առգրավվել են քրեական վարույթի համար հետաքրքրություն ներկայացնող առարկաներ։ Մամուլի խոսնակ Կիմա Ավդալյանը նշեց, որ մարզասրահները բաց են, իրենց բնականոն հունով աշխատում են։

Թե ինչ չափի հարկերի թաքցնելու մասին է խոսքը, ՔԿ-ից չեն հայտնում։ Հիշեցնենք, որ «Ռիբոկ» ակումբը պատկանում է ԱԺ նախկին պատգամավոր Ռուբեն Գեւորգյանին՝ «Ծաղիկ Ռուբո»։

Երեկվանից փորձում ենք կապ հաստատել Ռուբեն Գեւորգյանի հետ, սակայն զանգերին չի պատասխանում։ Դատելով վերջին շրջանում տեղի ունեցող քաղաքական հետապնդումներից, կարելի է ենթադրել, որ սա ճնշում է գործարարների նկատմամբ՝ իշխանությունը հասկացնում է՝ «հանգիստ նստեք տեղներդ» ։

Հիշեցնենք, որ այսօր մենք հրապարակել ենք Արթուր Սողոմոնյանի հայտարարությունը․

«Չեմ հասկանում, թե ինչի հետ են կապված իմ անվան և Հայաստանում իմ կողմից աջակցվող ֆիթնես ակումբների շուրջ ծավալվող գործողությունները։

Եթե սրանք ինձ քաղաքականության մեջ ներքաշելու փորձեր են, ապա դա անօգուտ է, քանի որ ես ակտիվորեն և վստահորեն ներգրավված եմ մարդասիրական նախագծերում, և այս գործունեությունը համարում եմ քաղաքականության հետ անհամատեղելի։ 

Հետևաբար, ես չեմ պլանավորում անդամակցել որևէ կուսակցության, և առավել ևս՝ ինքս զբաղվել քաղաքականությամբ։

Ինչ վերաբերում է Եկեղեցու աջակցությանը և Սամվել Կարապետյանի հայտարարություններին, կրկնում եմ. որպես հայ և հավատացյալ քրիստոնյա, ես Հայ Առաքելական Եկեղեցին համարում եմ մեր գլխավոր սրբավայրը։ Մենք տաճար ենք գալիս թե՛ վշտի և թե՛ ուրախության պահերին՝ օգնություն և ներողություն աղերսելով։ Եթե այսօր Հայ Եկեղեցին աջակցության կարիք ունի, ես պետք է այնտեղ լինեմ։

Ինչ վերաբերում է հարկային պահանջներին, կարող եմ միայն ասել, որ միշտ գործել եմ օրենքի սահմաններում և վստահ եմ, որ տեսչական մարմիններն ու փաստաբաններն ամեն ինչ կկարգավորեն։ Ինձ համար Հայաստանը փող աշխատելու վայր չէ, Golds Gym ֆիթնես ցանցի գլխավոր առաքելությունը ազգի առողջությունն ամրապնդելն է»։