Ուզում են եկեղեցին դարձնել կուսակցական «կանտորա». Տեր Շահենը` Փաշինյանի քայլերի մասին

Կաթողիկոսի հնարավոր փոխարինման, կանոնադրության փոփոխության և եկեղեցու կարգերի վերաձևման վերաբերյալ հարցերը եկեղեցական իրավակարգով ամբողջապես գտնվում են Ազգային եկեղեցական ժողովի իրավասության տիրույթում։ Sputnik Արմենիայի հետ զրույցում այս մասին ասաց Տեր Շահե ծայրագույն վարդապետ Անանյանը` անդրադառնալով ՀՀ վարչապետ Նիկոլ Փաշինյանի նախաձեռնած հակաեկեղեցական արշավին։

Փաշինյանը հուլիսի 23–ին հայտարարեց, որ «Վեհարանն ազատագրելու» շարժման անդամները պետք է համապատասխանեն որոշակի չափանիշների ու ինքը համապատասխանում է դրանց և կարող է առաջնորդել շարժումը։ Նա առաջարկեց Գարեգին Երկրորդին հեռացնելուց հետո կաթողիկոսական տեղապահ նշանակել բարեվարքությամբ աչքի ընկնող ամուսնացյալ քահանայի, իսկ կաթողիկոսական նոր ընտրությունների առաջ աշխարհաբար թարգմանել «Կանոնագիրք» հայոց»–ը։

«Հիմա բոլոր հարցերի պատասխանը տալիս է Ազգային եկեղեցական ժողովը՝ ում կնշանակեն տեղապահ, ինչ կանեն, ինչպես կստուգեն։ Դա ոչ իմ, ոչ որևէ մեկ այլ անձի քննարկելիքը չէ։ Դա Հայ առաքելական եկեղեցու բարձրագույն օրենսդիր և կաթողիկոսընտիր մարմնի լիազորությունն է։ Մնացած բոլոր դեպքերում դրանք ավելին չեն, քան պարզապես առաջարկություններ։ Էլ չեմ խոսում, եթե հարցը զուտ դավանաբանական շերտ և

տարողունակություն ունի, դա նաև Եպիսկոպոսաց ժողովի որոշելիքն է», – ասաց Տեր Շահե ծայրագույն վարդապետ Անանյանը։

Ինչ վերաբերում է ամուսնացյալ քահանայի նշանակման հնարավորությանը՝ հոգևորականը նշեց` Հայ եկեղեցու պատմության մեջ ընդամենը մեկ բացառություն է եղել 20-րդ դարի սկզբին։

«Ցեղասպանությունից հետո Հովհաննես ավագ քահանա Մկրյանը Կոստանդնուպոլսի պատրիարքի տեղապահ է եղել։ Բայց կաթողիկոսի դեպքում նման նախադեպ մենք չենք ունեցել։ Կաթողիկոսի դեպքում, եթե եպիսկոպոս էլ չի եղել, եղել է վարդապետ, քահանա մենք չենք ունեցել», – նշեց Տեր Շահեն։

Անդրադառնալով Փաշինյանի` եկեղեցու կանոնադրությունն աշխարհաբարով փոխարինելու հայտարարությանը` հոգևորականը նշեց, որ նույնիսկ աշխարհաբար թարգմանելու դեպքում կանոնադրությունն ամբողջությամբ չի արտացոլում եկեղեցու կանոնական իրավունքը։ Նրա խոսքով՝ կանոնադրության մեջ ներառված են մինչև 11-րդ դարի կանոններ, մինչդեռ եկեղեցին դրանից հետո էլ է կանոններ հաստատել։

Նյութն ամբողջությամբ՝ սկզբնաղբյուր կայքում