«Ինչ ուզեմ՝ կանեմ». «Ֆայտոն»-ի սեփականատերն ասել է, թե իբր իր թիկունքին Ալեն Սիմոնյանն է կանգնած. գիտի՞ ԱԺ նախագահն այդ մասին

NEWSPRESS.am-ն ահազանգ է ստացել «Ֆայտոն Գրուպ» ՍՊ ընկերության տաքսի ծառայություններ մատուցող  «Ֆայտոն» տաքսի ծառայություններից օգտված ուղևորներից: Վերջիններս մեզ հետ զրույցում դժգոհություններ հայտնեցին առ այն, որ ընկերությունն իրենց ուղեվարձի ՀԴՄ կտրոն չի տրամադրել: Մինչդեռ, կտրոնը ոչ միայն անհրաժեշտ է եղել ուղևորին՝ այն համապատասխան վայր ներկայացնելու համար, այլև ՊԵԿ նոր կարգավորումների համաձայն՝ օնլայն հարթակում գործող ուղևորափոխադրող կազմակերպությունները պարտավոր են ուղևորին տրամադրել ՀԴՄ կտրոն:

Մեզ հետ զրույցում, ուղևորները հայտնել  էին նաև, որ «Ֆայտոն» տաքսի ծառայությունից օգտվել են զուտ այն պատճառով, որ համանման ծառայություն մատուցող մրցակից մյուս բոլոր ուղևորափոխադրողներից սա ամենամատչելին է եղել:

«Եթե  իմանայի, որ ուղեվարձի ՀԴՄ կտրոն չեմ ստանալու՝ ավելի լավ էր ուրիշ մեքենայով գնայի: Դա ինձ համար խնդիր առաջացրեց: Է, ի՞նչ պատկերացնեի: Հիմա եմ հասկանում, թե ինչու էր տոմսն ավելի էժան»,-ասաց մեր զրուցակիցը:

Նրան ավելի շատ մեկ այլ դրվագ էր զայրացրել:

«Երբ ասացի՝ ես կբողոքեմ, ինձ պատասխանեցին, թե՝ ում ուզում ես՝ գնա-բողոքի: Ու հետո, գիտե՞ք, թե ինչ իմացա: Էդ «Ֆայտոն»-ի տերն ասել է՝ իմ դեմ խաղ չկա, իմ թիկունքին Ալեն Սիմոնյանն է (ԱԺ նախագահ) կանգնած: Չեմ հասկանում՝ ամենաթողությո՞ւն է: Սե՞նց են պայքարում կոռուպցիայի դեմ»,-վրդովված ասաց մեր զրուցակիցը:

NEWSPRESS.am-ը հարցմամբ դիմել է ՊԵԿ-ին, թե՝ լիցենզավորվե՞լ է «Ֆայտոն» տաքսի ծառայությունը` որպես ոչ կանոնավոր ուղևորափոխադրող ու, եթե ընկերությունն ունի Էլեկտրոնային հարթակով ուղևորափոխադրման
ծառայության մատուցման թույլտվություն,  տրամադրո՞ւմ է արդյոք էլեկտրոնային
ՀԴՄ կտրոններ և վճարո՞ւմ է արդյոք դրանից գոյացած պետական տուրքերը։

Հարցումն ուղարկելուց մի քանի օր անց ՊԵԿ-ից մեզ տեղեկացրին, որ հարցմանն արձագանքելու համար պահանջվում է կատարել լրացուցիչ աշխատանք և ժամանակ: Իսկ դրանից արդեն ավելի քան մեկ անց էլ վերջապես եկավ պատասխան: 7 էջից բաղկացած պատասխանն իրենից ներկայացնում էր «դասախոսություն» այն մասին, թե որ մեքենաներն են համարվում ուղեփոխադրող, ինչ եղանակով են կատարվում ուղեփոխադրումներ, ովքեր են համարվում ուղևորներ ու էլի մի շարք օրենքի կետեր, որոնցով կանոնակարգվում են ուղեփոխադրումները:

Իսկ ինչ վերաբերում է «Ֆայտոն» տաքսի ծառայությանը, ապա դրա մասին վերջին էջում կար մի պարբերություն. իսկ  ավելի կոնկրետ՝ 5 տող, որտեղ նշված էր, որ կազմակերպությունը լիցենզավորված է, ունի հաշվառված 20 աշխատող, սեպտեմբերի 1-ից մինչ օրս պետությանը վճարել է 3,333,598 ՀՀ դրամ: Ինչ վերաբերվում է ՀԴՄ կտրոնների տրամադրմանը, ապա այս մասին` ոչ մի խոսք: 

Այս պարագայում, իհարկե, անհասկանալի է, թե ինչի համար էր ՊԵԿ-ին հարկավոր լրացուցիչ աշխատանք, եթե մեզ հետաքրքրող հարցի պատասխանն այդպես էլ չստացանք:

Հաշվի առնելով վերը նշված ահազանգը` ՊԵԿ-ին առաջարկում ենք դասախոսության փոխարեն գործնական աշխատանք կատարել. գնալ ահազանգի հետքերով և ուսումնասիրություններ անել` պարզելու համար` արդյոք «Ֆայտոն» տաքսի ծառայությունը գործունեություն է ծավալում միայն օրենքի տառին համապատասխա՞ն, թե՞ անօրինական քայլերի է դիմում:

Տրամաբանական է, որ եթե ընկերությունն ամբողջությամբ գործեր օրինական դաշտում, ապա այն ներկայացնող իրավաբանական անձը չէր սպառնա բողոքողներին, թե՝ լավ եմ անում, ինչ ուզում` անում եմ, ում ուզում եք` գնացեք-բողոքեք և, առավել ևս, չէր շրջանառի պաշտոնյաների անուններ՝ հայտարարելով, թե թիկունք ունի:

Ի դեպ, ինչ վերաբերում է Ալեն Սիմոնյանի անվան հետ կապված տեղեկատվությանը, ապա NEWSPRESS.am-ը փորձեց պարզել, թե որքանո՞վ է դա համապատասխանում իրականությանը. որևէ կապ ունի՞ Ալեն Սիմոնյանը հիշյալ ընկերության հետ և արդյոք ընդհանրապես տեղյա՞կ է, որ այդ ծառայությունը մատուցող ընկերության ղեկավարը շահարկում է իր անունը:

Մեզ տեղեկացրին, որ Ալեն Սիմոնյանն արձակուրդի մեջ է, բայց խոստացան փոխանցել նրան հարցադրումը և արձագանքել առաջին իսկ հնարավորության դեպքում:

Արմինե Մկրտումյան