Սկանդինավիայի հայերի միությունից ահազանգում են փաշինյանական ավտորիտարիզմի աճի մասին

Հայ գործարար Սամվել Կարապետյանի անօրինական կալանքը վկայում է Նիկոլ Փաշինյանի աճող ավտորիտարիզմի մասին, որը 2026 թվականի խորհրդարանական ընտրություններից առաջ փորձում է «լռեցնել ընդդիմությանը»։ Այդ մասին «ՌԻԱ նովոստի»-ին հայտնել են Սկանդինավիայի հայերի միությունից:

«Մենք խորապես մտահոգված ենք հայտնի հայ բարերար և գործարար Սամվել Կարապետյանի՝ քաղաքական դրդապատճառներով ձերբակալությամբ և նրան վերագրվող անհիմն մեղադրանքներով: Նրա անօրինական կալանքը վարչապետ Նիկոլ Փաշինյանի աճող ավտորիտարիզմի և այլախոհությունից նրա վախի վառ օրինակ է: Կարապետյանի դեմ գործը ոչ միայն ծիծաղելիորեն անհիմն է, այլև ընդդիմությանը լռեցնելու և հանրությանը 2026 թվականի ընտրություններից առաջ վախեցնելու հստակ փորձ»,- ռուսական լրատվական գործակալության հարցմանն ի պատասխան գրել է միության ներկայացուցիչը:

Նա հավելել է, որ իշխանությունների կողմից Հայ Առաքելական Եկեղեցու (ՀԱԵ) վրա աճող ճնշումը նույնպես մտահոգիչ է Սկանդինավիայի հայերի համար։

«Հայաստանի ամենահին հաստատության վրա այս հարձակումները ցույց են տալիս Փաշինյանի թշնամանքը իր վերահսկողությունից դուրս գտնվող ցանկացած ազդեցության կենտրոնի նկատմամբ։ Ի տարբերություն դրա, Սամվել Կարապետյանը մշտապես գործել է որպես Եկեղեցու առատաձեռն բարերար՝ ֆինանսավորելով սրբավայրերի վերականգնումը և աջակցելով դրա մարդասիրական առաքելություններին, ինչը ևս մեկ անգամ ցույց է տալիս, թե ինչու է նա թիրախավորվել հասարակության անկախ սյուների նկատմամբ անհանդուրժող ռեժիմի կողմից», -նշել է գործակալության զրուցակիցը։

Կարապետյանի «Հայաստանի էլեկտրական ցանցեր» ընկերությունն ազգայնացնելու փորձերը, որոնց դեմ հանդես է եկել Ստոկհոլմի միջազգային արբիտրաժային դատարանը, ինչպես նաև «Տաշիր» ընկերությունների խմբի հետ կապված ձեռնարկությունների կամայական ստուգումներն ու փակումները ոչ միայն կործանում են երկրի տնտեսությունը, այլև իրականացվում են քաղաքական պատճառներով՝ «ամրապնդելով Փաշինյանի մենաշնորհային վերահսկողությունը հիմնական տնտեսական ճյուղերի նկատմամբ»,-հավելել է նա։

Ըստ համայնքի ներկայացուցչի՝ Հայաստանի կարևորագույն էներգետիկ ենթակառուցվածքների նկատմամբ Փաշինյանի կողմնակիցների վերահսկողության հաստատումը սպառնում է երկրի էներգետիկ անվտանգությանը և անխուսափելիորեն կվախեցնի օտարերկրյա ներդրողներին՝ հանգեցնելով Հայաստանի տնտեսության հետագա մեկուսացմանը։

«Սկանդինավյան հայերի միությունը կոչ է անում Փաշինյանի անհապաղ հրաժարականը՝ Լեռնային Ղարաբաղի հարցում Ադրբեջանին արված զիջումների, այլախոհությունը ճնշելու և «արտաքին քաղաքականության մեջ աղետալի ձախողումների» պատճառով»,-ասել է ներկայացուցիչը և հավելել. «Այս զիջումները, զուգորդվելով նրա կառավարության ներքին ճնշումների հետ, թուլացրել են Հայաստանը թե՛ միջազգային, թե՛ ներքին մակարդակով։ Այս բացասական միտումը դադարեցնելու, օրենքի գերակայությունը վերականգնելու, հիմնարար ազատությունները պաշտպանելու և հայ ժողովրդի նկատմամբ վստահությունը վերականգնելու համար անհապաղ անհրաժեշտ է ղեկավարության փոփոխություն»։