Վարորդի պաշտպանն ասել է՝ Սոնա Մնացականյանը գուցե քաղաքական հայացքներով պայմանավորված դիտավորյալ չի զիջել

Այս պահին դատարանը լուծել է միայն մեղավորության հարցը, ինչից տուժող կողմը գոհ է այն իմաստով, որ դատարանի կողմից կայացված վերդիկտը բխում է գործով հավաքված եւ դատարանում հետազոտված ապացույցների ծավալից։ Այս մասին, այսօր՝ հուլիսի 30–ին, դատարանի բակում լրագրողների հետ զրույցում նշեց Նիկոլ Փաշինյանի ավտոշարասյան վրաերթից մահացած Սոնա Մնացականյանի գործով տուժող կողմի պաշտպան Րաֆֆի Ասլանյանը։

«Հաջորդիվ արդեն լրացուցիչ դատալսումների փուլում դատարանը անդրադառնալու է պատժի հարցին։ Բնականաբար, 244–րդ հոդվածով պատիժ չի նշանակելու, որովհետեւ 2022–ի հուլիսի 1–ից ուժի մեջ մտած  քրեական օրենսգրքով ճանապարհատրանսպորտային պատահարի վայրը լքելը այլեւս հանցագործություն չէ։ Այսինքն տվյալ հանրորեն վտանգավոր արարքը ապաքրեականացված է, հետեւաբար այդ հիմքով պատիժ չի նշանակի դատարանը, իսկ 242-րդ հոդվածի երկրորդ մասով բնականաբար նշանակելու է պատիժ։

Ըստ տվյալ պահին գործող քրեական օրենսգրքի, նշված արարքի համար նախատեսված էր ազատազրկում մինչև 5 տարի ժամկետով։ Նոր քրեական օրենսգրքում ազատազրկումը 2-5 տարի ժամկետով է, բայց հաշվի առնելով, որ անձի վիճակը վատթարացնող է, բնականաբար տվյալ դեպքում կիրառելի է նախկին քրեական օրենսգիրքը»,–ասաց նա։

Դիտարկմանը, որ ամբաստանյալը մինչև օրս պնդում է, որ անմեղ է, որ ինքը արագությունը չի գերազանցել, Րաֆֆի Ասլանյանն ասաց. «Ամբաստանյալը և ամբաստանյալի պաշտպանները օրենքով չարգելված բոլոր միջոցներով պաշտպանվելու իրավունք ունեն, հետևաբար իրենց մեղադրանքը վիճարկելը բխում է իրենց քրեադատավարական իրավունքից։ Բայց երբ պաշտպանության կողմը դա վերածում է արդեն իրավական շանտաժի, օրինակ, պաշտպան Բալոյանը երեկ ասում էր, որ Սոնա Մնացականյանը գուցե քաղաքական հայացքներով պայմանավորված դիտավորյալ չի զիջել և դիտավորյալ հատել է ճանապարհը կամ դիտավորյալ հետ քայլ է կատարել, այսինքն երբ փորձում են տուժող անձին ինքնասպանություն վերագրել, սա արդեն, ես կարծում եմ՝ իրավունքի տիրույթում այնուամենայնիվ չի տեղավորվում։ Որքան էլ ազատ պաշտպանվելու հնարավորություն ունի կողմը, պետք է այդ սահմանները պահպանի»։

Նա նշեց, որ եթե դժգոհ լինեն դատավճռից, ապա կբողոքարկեն։