Ադրբեջանը կարող է օկուպացնել Հայաստանը 2025-2026 թվականներին. ամերիկյան Army Times ռազմական պարբերականի կանխատեսումը

Տիգրան Հակոբյանը գրել է․

 

*Army Times (Military) պարբերականի Պենտագոնի մասնագետները կանխատեսում են, որ 2025-2026 թվականներին Ադրբեջանի կողմից Հայաստանի դեմ ռազմական գործողություն սկսելու հավանականությունը բարձր է: Վերլուծաբանները ենթադրում են, որ Բաքուն, ամենայն հավանականությամբ, պաշտոնապես չի հայտարարի պատերազմի մասին, բայց կարող է սկսել լայնածավալ հարձակում՝ այն ներկայացնելով որպես հատուկ ռազմական գործողություն՝ ուղղված այսպես կոչված «հայկական ֆաշիզմի դեմ պայքարին» և «պատմականորեն իրեն պատկանող տարածքների վերադարձին»:

 

*Վերլուծությունների համաձայն՝ Ադրբեջանը հավակնում է Հայաստանի զգալի տարածքների նկատմամբ: Ադրբեջանի նախագահ Իլհամ Ալիևը բազմիցս հայտարարել է, որ, իր կարծիքով, Հայաստանը «ֆաշիստական պետություն է», իսկ ֆաշիզմի դեմ պայքարը պարտականություն է, որը կամ պետք է կատարի հայկական իշխանությունը, կամ այն կվերցնի իր վրա Բաքուն: Բացի այդ, Ալիևը նախկինում պնդել է, որ հայկական պետությունն ստեղծվել է «օտար հողերի վրա», և ժամանակակից Հայաստանը գտնվում է «Ադրբեջանին պատկանող տարածքներում»:

 

*Հետախուզական աղբյուրները հայտնում են, որ Թուրքիան Ադրբեջանի դաշնակիցն է լինելու հակամարտության դեպքում, մինչդեռ Հայաստանը, ամենայն հավանականությամբ, կփորձի աջակցություն ստանալ Ֆրանսիայից: Սակայն կանխատեսվում է, որ Փարիզը չի կարողանա ժամանակին և բավարար աջակցություն ցուցաբերել: Ինչ վերաբերում է ՀԱՊԿ-ին, որի անդամակցությունը Հայաստանը փաստացիորեն կասեցրել է, ապա այս դաշինքին դիմելը նույնպես քիչ հավանական է:

 

*Փաշինյանն ու Ալիևը շարունակում են բարդ բանակցությունները:

Նյութի հեղինակները հիշեցնում են, որ Հայաստանը կորցրել է վերահսկողությունը Լեռնային Ղարաբաղի նկատմամբ, ինչպես նաև զիջել է մի շարք վիճահարույց բնակավայրեր: Եթե Ադրբեջանը որոշի անցկացնել համազորային գործողություն՝ կիրառելով ավիացիա, հրետանի, հրթիռային համալիրներ, շարժական հետևակ և անօդաչու սարքեր, ապա Հայաստանի տարածքը կարող է ամբողջությամբ օկուպացվել: Այս դեպքում կանխատեսվում է փախստականների մեծ հոսք, որոնց մեծ մասը կուղևորվի Ռուսաստան, հատկապես՝ Կրասնոդար երկրամաս, որտեղ բնակվում է մեծ հայկական սփյուռք:

 

*Բացի այդ, 2024 թվականին հայտնի դարձավ ֆրանսիական Caesar ինքնագնաց հրետանային համակարգերի մատակարարման պայմանավորվածության մասին: Սակայն Ադրբեջանի պաշտպանության նախարարությունում այս գործարքը գնահատեցին որպես «սադրիչ», պնդելով, որ Ֆրանսիան իր գործողություններով միայն սրում է լարվածությունը տարածաշրջանում և խոչընդոտում իրավիճակի կայունացմանը: Ալիևը կողմ էր այս դիրքորոշմանը՝ հայտարարելով, որ Հայաստանի նման «ռազմականացումը» անխուսափելիորեն կբերի լարվածության սրմանը:

 

*Ալիևն ակնարկել է, որ Հայաստանը «սպառնալիք է» Հարավային Կովկասի համար՝ ընդգծելով, որ երկրում տասնամյակներ շարունակ իշխանության ղեկին են եղել «ֆաշիստական գաղափարախոսության հետևորդներ»: Ըստ Ադրբեջանի առաջնորդի՝ իրավիճակը պահանջում է արմատական միջոցներ, քանի որ, ինչպես նշել է Ալիևը, «ֆաշիզմի վտանգը չի վերացել»: Ալիևի կարծիքով՝ այդ սպառնալիքը վերացնել հնարավոր է միայն կտրուկ գործողությունների միջոցով՝ կամ հայկական իշխանությունների, կամ Ադրբեջանի միջամտության դեպքում:

 

*Army Times-ը ընդգծում է, որ իրավիճակը Հարավային Կովկասում շարունակում է մնալ ծայրաստիճան անկայուն: Հնարավոր լայնածավալ գործողության մեկնարկը, դրա ծավալներն ու հետևանքները կախված կլինեն տարածաշրջանում ուժերի հավասարակշռությունից, միջազգային դերակատարների ներգրավվածության աստիճանից և նրանց՝ հակամարտող կողմերի վրա ազդեցություն գործելու կարողությունից: