Ոստիկանները գիտեին, որ բնակչի մոտ զենք կա, կանգնեցրել են ու մոտեցել, ինչն ավարտվել է սպանությամբ

Արմավիրի մարզում ոստիկանի սպանության և ևս երկու ոստիկանի սպանության փորձի մեջ մեղադրվող Մանուկ Մարգարյանն արդեն մեկ տարի է, ինչ կալանքի տակ է։ Նրա վերաբերյալ վերաբերյալ քրեական գործն ընդամենը երեք ամիս առաջ դատարան է ուղարկվել,  բայց արդեն հասցրել է դատական կազմ փոխել։ Այժմ գործն Արմավիրի մարզի ընդհանուր իրավասության դատարանի դատավոր Արման Բաբախանյանի վարույթում է։ Վերջինս որոշել է ևս երեք ամսով երկարացնել Մանուկ Մարգարյանի նկատյմամբ ընտրված խափանման միջոց կալանքի ժամկետը։

Դեպքը, հիշեցնենք, տեղի է ունեցել մեկ տարի առաջ՝ 2024թ սեպտեմբերի 7-ին՝ Արմավիրի մարզի Նալբանդյան գյուղում։ Մամուլն այդ ժամանակ գրեց, որ Արմավիրում կրակոցներ են հնչել, ինչի հետևանքով ոստիկան է սպանվել, ևս մեկ ոստիկան՝ վիրավորվել։

Քրեական գործի տվյալներով՝ սեպտեմբերի 7-ին ՀՀ ՆԳՆ ոստիկանության Արմավիրի մարզային վարչության Արմավիրի բաժնի ՀՈԲ տեսուչներ Արթուր Այվազյանը, Մնացական Հովհաննիսյանը, օպեր լիազոր Հայրապետ Ստեփանյանը, հերթապահ մասի պետ Հայկ Դանիելյանը, ԱԲ և ԸԲԿԲ պետ Նարեկ Ավետիսյանը, օպերատիվ տվյալներ են ստացել այն մասին, որ Արմավիրի մարզի Նալբանդյան բնակավայրի բնակիչ Մանուկ Մարգարյանը եղբոր՝ Հակոբ Մարգարյանի անվամբ հաշվառված «ՎԱԶ 2107» մակնիշի ավտոմեքենայում ապօրինի կերպով հրազեն է պահում, ինչից հետո մեկնել են Նալբանդյան բնակավայր։ Մինչդեռ, կան տեղեկություններ, որ անձը նախապես հայտնել է զենքը հանձնելու մտադրության մասին, իսկ «բռնելու» օպերացիան արդեն թերեւս այլ նպատակ է ունեցել։

Ինչեւէ, ճանապահին, ըստ մեղադրանքի, ոստիկանները նկատել են Մանուկ Մարգարյանին, որը վարելիս է եղել ավտոմեքենան,  կանգնեցրել են նրան, ապա վերջինիս ձերբակալելու նպատակով մոտեցել են նրան: Մանուկ Մարգարյանը, տեսնելով իրեն մոտեցող ոստիկաններին, ըստ գործի տվյալների,   ԱԿՍ-74 մոդելի   ինքնաձիգից՝  իր կողմից վարվող ավտոմեքենայի սրահից կրակոցներ է արձակել ոստիկանության աշխատակիցների ուղղությամբ, ապա իջել է մեքենայից և շարունակել կրակոցներ արձակել՝ նրանց ուղղությամբ։

Կրակոցների հետևանքով  Արթուր Այվազյանը ստացել է վնասվածքներ՝ պարանոցի շրջանում՝ զուգորդված գլխի, կրծքավանդակի, որովայնի, աջ ուսահոդի շրջանների բեկորային չթափանցող վնասվածքներով, իսկ Հայրապետ Ստեփանյանը ստացված վնասվածքներից մահացել է։  Վերջինս  ստացել էր՝ 5 գնդակային՝ կրծքավանդակի խոռոչ թափանցող կույր վիրավորումով` զուգորդված փափուկ հյուսվածքների, մկանախրձերի, 4-րդ կողոսկրի, թոքերի, սրտապարկի, սրտի, աորտայի, կերակրափողի վնասումներով` զուգորդված երկկողմանի հեմոթորաքսի ձևով։ Դեպքի վայրում գտնվող մյուս ոստիկանները վնասվածք չեն ստացել՝ թաքնվելով կրակոցներից։ Դեպքի վայրից, ըստ գործի տվյալների, Մանուկ Մարգարյանը փախուստի է դիմել։ Նշված դեպքից հետո զենքը Մարգարյանը պահել է Սարգիս Հարությունյանի անասնագոմի տարածքում, վերջինս ներկայացրել է զենքերը, որոնք վերցվել են։