Ռոբերտ Քոչարյանի թիմից «արտագաղթ» է սկսելու Սամվել Կարապետյանի թիմ. հայտնի են առաջին անունները

NEWSPRESS.am-ի տեղեկություններով` այսպես ասած «արտագաղթ», իսկ ավելի քաղաքական տերմինով ասած` ճամբարափոխություն է սկսվելու Ռոբերտ Քոչարյանի ղեկավարած «Հայաստան» դաշինքից դեպի Սամվել Կարապետյանի կողմից ստեղծված «Մեր ձևով» շարժում, որը հետագայում կուսակցության կվերափոխվի: 

Մեր տեղեկություններով` ճամբարափոխության «օպերացիա»-ն ղեկավարում է հայտնի դաշնակցական Աղվան Վարդանյանը, առնվազն իր հետ տանելով նաև մեկ անգամ արդեն ճամբարափոխ եղած Աննա Գրիգորյանին: Հիշեցնենք, որ Գրիգորյանը քաղաքական դաշտում հայտնվել է` կապված լինելով հենց այն ՔՊ-ի հետ, որին այսօր քննադատում է: 

Պրոցեսը միայն այս մարդկանցով, թերևս դժվար թե ավարտվի, քանի որ «Հայաստան» դաշինքի ներսում շատերն են հասկացել, որ Ռոբերտ Քոչարյանն ընդամենը Նիկոլ Փաշինյանի իշխանությունը երկարաձգողն է: Չէ՞ որ իրեն ամենամեծ քաղաքական ուժի ղեկավար հռչակած Քոչարյանը, որը ծնունդով, արմատներով արցախցի է, իր քաղաքական կենսագրության մի կարևոր շրջան անցկացրել է Արցախում, ոչ մի փողոցային ցույց չի էլ փորձել նախաձեռնել Արցախի ամբողջական հայաթափումից հետո: Քոչարյանը լուռ սպասում է 2026-ի խորհրդարանական ընտրություններին այն պայմաններում, երբ Նիկոլ Փաշինյանն ակտիվորեն բանակցում է Սյունիքի մարզից սրան-նրան տարածքներ ու ճանապարհներ հանձնելու շուրջ: 

Մի ժամանակ` հատկապես 2020-ի պատերազմից հետո հասարակության մեջ մի այսպիսի խուլ բողոք կար` «ընդդիմությունը սպասում է Նիկոլը հողերը տա (նկատի ունենալով Արցախի, Սյունիքով միջանքի ու անկլավների հողերը-խմբ.), հետո իրենք գան` մաքուր էջից սկսեն կառավարել` շարունակելով թալանը»: 

Բանալի բառը` «սպասում է»: 

Նայելով այսօրվա իրադարձություններին` այն ժամանակվա այդ տեսությունն այսօր կարծես իրական է դառնում. Փաշինյանն արդեն ճանաչել է Արցախն ամբողջությամբ Ադրբեջանի կազմում, հրաժարվել է Հայաստանի սուվերեն տարածքից ռազմական ճանապարհով օկուպացված տարածքներից, ինչ-որ անհասկանալի սահմանազատմամբ Տավուշից տարածքներ է հանձնել, անհայտ է այսպես կոչված «անկլավների» ճակատագիրը, իսկ իրեն ամենամեծ ընդդիմադիր ուժի ղեկավար հռչակած Քոչարյանն սպասում է: Ավելին` ոչ միայն իր, այլև իրեն ենթարկվղ մանրումիջին դեմքերի միջոցով ծաղրում է «իմպիչմենտ+փողոցային պայքար» եղանակով Նիկոլ Փաշինյանին հեռացնելու ճանապարհը: Սպասում է այն ընտրություններին, որոնցով գրեթե անհնար է գործնականում հաղթել այն մարդուն, որը մշտապես է կեղծում. վկա` նրա նախկին ու ներկա հայտարարությունները, թեկուզ միայն նույն Արցախի մասին: Մի ընտրությունը Փաշինյանի համար կեղծելն ի՞նչ է, որ չկարողանա կեղծել: Եթե իհարկե, դրա կարիքն առաջանա: 

Եվ ահա, այս ամենը, հիմար չեն` հասկանում են «Հայաստան» դաշինքի ներսում, որքան էլ փրփուրները բերանին փորձում են տեսախցիկների առաջ արդարացնել իրենց առաջնորդի արածներն ու ասածները: Հասկանում են, որ 2026-ին սպասելը նախ մեկ տարի, ապա ևս 5 տարի ժամանակ է տալու Նիկոլ Փաշինյանին: Ոմանք, չգիտենք` Ռոբերտ Քոչարյանի ցուցումով` որպես արբանյակ, թե գրկից գիրկ տեղափոխվելու իրենց հին սովորության համաձայն, որոշել են գնալ Սամվել Կարապետյանի թիմ: Թիմ, որը փողոցով իշխանություն փոխելու տարբերակ, ըստ էության չունի, բայց որի` ընտրություններով մանդատներ ստանալու շանսերը մեծ են: 

Ի՞նչ խոսք, գործող պատգամավորից նախկին պատգամավոր դառնալու հեռանկարը տխուր է: Շրջագայությունները, պարգևավճարները, ճոխ աշխատավարձն ու շեֆի «բարի աչքով» նայելը գործազուրկ դառնալու հեռանկարից ամենևին էլ նախընտրելի չեն: