Վանքի դուռն էլ դարձավ փողով

Արդեն մի քանի օր է Հաղարծինից ահազանգ է ստացվել այն մասին, որ դեպի եկեղեցական համալիր տանող ճանապարհին արգելափակոց են (шлагбаум) տեղադրել և վերև բարձրացող յուրաքանչյուր մեքենա վճարում է 300 դրամ:

Տավուշի թեմի առաջնորդ Տ. Բագրատ եպիսկոպոս Գալստանյանը, իր պատկերացմամբ, փորձել է պարզաբանում տալ իրավիճակին՝ երևույթը կոչելով «քաղաքակիրթ եղանակով ավտոկայանատեղի ստեղծելու գաղափար»:

Նա իր պարզաբանման մեջ 10 պատճառ է մատնանշել, որոնք, իր իսկ կարծիքով, արդարացնում են դրամահավաքությունը: Նկատենք, որ եկեղեցու տարածք մուտքի համար գումար վճարելը իրականացվում է Էջմիածնի Մայր Աթոռի գիտությամբ:

Ամենայն հայոց կաթողիկոսի մամլո խոսնակ տեր Վահրամ քահանա Մելիքյանը newspress.am-ի հետ զրույցում երևույթը մեկնաբանելու համար խոսքեր չշռայլեց: Պարզապես հավանության արժանացրեց Տ. Բագրատ եպիսկոպոս Գալստանյանի նախաձեռնությունը:

«Ի՞նչ է, վա՞տ է մեքենաների կայանումը կանոնակարգելը»,- մեր հարցին հարցով պատասխանեց Վահրամ քահանա Մելիքյանը:

Դիտարկմանը, թե մուտքը վճարովի դարձնելը կարող է շատ զբոսաշրջիկների դժգոհության առիթ դառնալ ու նվազեցնել այցելությունը եկեղեցի, Ամենայն հայոց կաթողիկոսի մամլո խոսնակը արձագանքեց. «Ձեր հարցերով դիմեք Տեր Բագրատին. ցտեսություն»,-ասաց ու դրեց լսափողը: