Արման ջան, սա ոչ միայն սիրուն չէ, այլև ամո՛թ է. Վանաձորի քաղաքապետի ճամբարափոխ խորհրդականն իրեն Սպարապետ է երևակայել

Երբ ուսումնասիրում ես Վանաձորի քաղաքապետարանի պաշտոնյաների սոցիալական էջերը, հասկանում ես, որ գրեթե բոլորն այստեղ տառապում են մեծամտության մոլուցքով:

Դեռ վերջերս էր NEWSPRESS.am-ը անդրադարձել Վանաձորի սպորտի և երիտասարդության հարցերի բաժնի պետի՝ Էրիկ Կոստանյանի ինքնասիրահարված կեցվածքին: Հիշեցնենք, որ նա իր էջում տեղադրել էր իր իսկ լուսանկարներից պատրաստված տեսահոլովակ, որտեղ փոխել էր Խաչիկ Արենցիի հեղինակային երգերից մեկի բառերը՝ այնտեղ զետեղելով իր անունը:

Հարկ է նկատել, որ երգը նվիրված էր հայ զինվորին ու հայոց աշխարհին: Եվ միայն մեր անդրադարձից հետո նա դժկամությամբ, բայց հանեց երգը իր էջից` ասելով, թե իբր ինքը կապ չունի՝ ընկերներն են սարքել:

Ինչևէ... եթե այդպես է, ապա պետք է նկատել, որ ընկերներն իրենց «ընկերոջ գլխին շատ լավ էին սարքել...»:

Այժմ էլ Վանաձորի  քաղաքապետի խորհրդական Արման Բենացյանն է իրեն համեմատել Սպարապետի հետ:

Երևի սա էլ կասի, թե՝ ինքը մեղք չունի, դրել են էջին, ինքն էլ երևի չի նկատել ու չի հանել էջից: Կարելի է բերել հազար ու մի պատճառաբանություն, բայց մենք չէինք կարող չնկատել, որովհետև սա սրբապղծություն է:

Իհարկե, լուսանկարը տեղադրված է միայն ընկերների համար, բայց թե մենք հո թշնամի չե՞նք: Ընկեր ենք, այն էլ նրանցից, ով ընկերաբար կասեր՝ Արման ջան, սա ոչ միայն սիրուն չէ, այլև ամո՛թ է:

Ժամանակին Հանրապետական էիր՝ հասկացանք, հիմա գնացիր դարձար ՔՊ-ական, որ պաշտոն ստանաս, դա էլ ենք փորձում հասկանալ, թեև հնարավոր չէ հասկանալ՝ ինչպես կարելի է երկիրը կապիտուլյացիայի ենթարկելու մեջ մեղադրվող իշխանության մաս կազմել (ինչևէ...): Բայց Սպարապետի հետ համեմատվելս ո՞րն է... Դու ընդամենը քայլ չարած ու քայլիստ դարձած շարքային փառատենչ ճամբարափոխ ես:   

Դու փափկաթոռներին ու բազմոցին պառկած մրափող սպարապետ որտե՞ղ ես տեսել: Ու, ընդհանրապես, տեսե՞լ ես... 

Ախր դասախոս մարդ ես, Վանաձորի պետական համալսարանում ոչ ավել-ոչ պակաս պատմություն ես պարապում: Դու սպարապետին այս ձևո՞վ ես ներկայացնում քո ուսանողներին:

Իսկ գուցե նրանցից մե՞կն է հենց կերտել քո այս կերպարը՝ տվածդ գիտելիքի համապատասխան:

Ասում են՝ տանն էլ ես պարապում պատմություն:

Քաղաքապետի խորհրդականի ու դասախոսի աշխատավարձը չի՞ բավարարում, թե՞ պարզապես որոշել ես քո նոր տիրոջը հաճոյանալ ու նրա թելադրած  պատմությունը հրամցնել մատաղ սերնդին՝ իրական կոչված Հայաստանի հորինված պատմությունը:

Այս ամենը ոչ միայն սիրուն չէ, այլև ամո՛թ է, Արման, մարդ եղիր ու հանիր այդ ապուշ նկարը քո էջից: Դու այն չես, ինչ երևակայում ես:

Արմինե Մկրտումյան