«Ավելի կիբեռանվտանգ Հայաստան»․ ԲՏԱ նախարար

Այսօր Աժ պետական-իրավական հարցերի մշտական հանձնաժողովի նիստում առաջին ընթերցմամբ դրական եզրակացություն է ստացել «Կիբեռանվտանգության մասին», «Հանրային տեղեկությունների մասին», «Տեղեկատվական համակարգերի կարգավորման մարմնի մասին» օրենքների նախագծերի փաթեթը։

Իմ խոսքում նշել եմ, որ հատկապես վերջին տարիներին կիբեռհարձակումների մտահոգիչ աճն ու ՀՀ-ում կիբեռանվտանգային միջավայրի խոցելիությունը ստիպել են մեզ արագ քայլեր ձեռնարկել` մշակելով և ԱԺ-ին ներկայացնելով օրենքների նախագծերի այս փաթեթները։ Այդ մասին ֆեյսբուքյան էջում մեջբերում է ԲՏԱ նախարար Մխիթար Հայրապետյանը․

«Խոսելով կարգավորման նպատակից՝ ընդգծել եմ, որ այն ուղղված է ՀՀ-ում կենսական նշանակության ոլորտների տեղեկատվական համակարգերում և կրիտիկական տեղեկատվական ենթակառուցվածքներում անվտանգ միջավայր ապահովելուն։

Անդրադարձ եմ կատարել նոր ինքնավար մարմնի` Տեղեկատվական համակարգերի կարգավորման մարմնի ստեղծմանն՝ ընդգծելով, որ այն ոչ միայն պատասխանատու է լինելու պետական համակարգի քաղաքացիական հատվածի կիբեռանվտանգության համար, այլև աջակցող գործառույթ է իրականացնելու մասնավոր ոլորտի համար՝ կիբեռմիջադեպերի հետևանքները համատեղ ջանքերով վերացնելու նպատակով:

Այս օրենսդրական փաթեթը բերում է թվային նոր ճարտարապետություն` հիմնված պաշտպանված տվյալների շտեմարանների և տվյալների գրագետ կառավարման վրա, ինչը կնվազեցնի կիբեռհարձակումների ռիսկը և կապահովի կրիտիկական տեղեկատվական ենթակառուցվածքների անվտանգությունը:

Ամփոփելով խոսքս` նշել եմ, որ այս նախաձեռնությունը ռազմավարական նշանակություն ունի մեր երկրի համար և ուղղված է ազգային անվտանգությանը սպառնացող ռիսկերի կառավարմանը, տնտեսական և ներդրումային միջավայրի բարելավմանն ու կիբեռանվտանգության ոլոտում նոր էկոհամակարգի ձևավորմանը»,- նշել է նախարարը։